టెక్సాస్‌లో దీపావళి వేడుకల మధ్యలో నిరసన ప్రదర్శన; వివాదాస్పద ప్లకార్డులు

అమెరికాలోని టెక్సాస్ రాష్ట్రంలో దీపావళి వేడుకల మధ్యలో నిరసన ప్రదర్శన జరిగింది. 'దీపావళి లైట్స్ ఆఫ్ ఇండియా' పేరుతో శనివారం నిర్వహించిన కార్యక్రమంలో కొంతమంది వివాదాస్పద ప్లకార్డులు ప్రదర్శించారు.

ఈ వేడుక టెక్సాస్‌లోని CRTL సెంటర్ ఆర్మరీలో జరిగింది. కార్యక్రమంలో భారతీయ సంప్రదాయ నృత్యాలు, సంగీత ప్రదర్శనలు, సాంస్కృతిక కార్యక్రమాలు ఏర్పాటు చేశారు.

వేడుకల మధ్యలో అమెరికా కార్యకర్త జేక్ లాంగ్, ఆయనకు మద్దతుగా వచ్చిన కొంతమంది గ్రూప్ సభ్యులు ప్రవేశించారు. వారు 'డిబోట్ ఆల్ డాట్ హెడ్స్' అని రాసిన ప్లకార్డులను ప్రదర్శించారు. 'స్టాప్ హిందూ రీప్లేస్‌మెంట్ ఆఫ్ క్రిస్టియన్స్' అని నినాదాలు చేశారు. ఈ నినాదాలపై కార్యక్రమానికి హాజరైన వారిలో అసంతృప్తి వ్యక్తమైంది.

ఈ ఘటనకు సంబంధించిన ఫోటోలను జేక్ లాంగ్ సోషల్ మీడియాలో పోస్ట్ చేశారు. తమపై యాంటీఫా కార్యకర్తలు, హిందువులు దాడి చేశారని ఆయన ఆరోపించారు. హిందూ సమాజంపై అభ్యంతరకర వ్యాఖ్యలు కూడా ఆయన చేశారు. టెక్సాస్‌లో డెమోక్రటిక్ పార్టీకి రాజకీయ ప్రయోజనం కలగడానికి హిందువులే కారణమని ఆయన పేర్కొన్నారు. ఈ ఘటనపై పోలీసుల స్పందన తెలియాల్సి ఉంది.

జేక్ లాంగ్ గతంలోనూ వివాదాల్లో ఉన్నారు. 2021 జనవరి 6న అమెరికా క్యాపిటల్ భవనంపై జరిగిన దాడిలో పోలీసులపై హింసకు పాల్పడ్డారనే ఆరోపణతో ఆయనను అరెస్టు చేశారు. సుమారు నాలుగేళ్లు జైల్లో ఉన్న ఆయనను 2025 జనవరి 20న అధ్యక్షుడు డొనాల్డ్ ట్రంప్ క్షమాభిక్ష ద్వారా విడుదల చేశారు.

ఈ ఘటనపై అమెరికా కాంగ్రెస్ సభ్యురాలు ప్రమీల జయపాల స్పందించారు. భారతీయ అమెరికన్లను లక్ష్యంగా చేసుకున్న ఈ ప్రదర్శనను ఆమె ఖండించారు. భయం లేకుండా తమ పండుగలు జరుపుకునే హక్కు భారతీయ అమెరికన్లకు ఉందని ఆమె అన్నారు. ఇలాంటి ప్రదర్శనలకు అమెరికాలో స్థానం లేదని ఆమె పేర్కొన్నారు.