అమెరికా ఎన్నికల ఓటమికి వలస విధానం, ఇరాన్ యుద్ధమే కారణం: ట్రంప్ అంగీకారం

అమెరికా మధ్యంతర ఎన్నికల్లో రిపబ్లికన్ పార్టీ ఓటమి తర్వాత అధ్యక్షుడు డొనాల్డ్ ట్రంప్ తన ధోరణిని మార్చుకున్నారు. ఓటమికి కారణాలను ఆయన స్వయంగా అంగీకరించారు.

పరాజయం తర్వాత తొలి ఇంటర్వ్యూలో ట్రంప్ మాట్లాడారు. తమ ప్రభుత్వం అమలు చేసిన కఠినమైన వలస విధానం ఎన్నికల్లో నష్టం చేసిందని చెప్పారు. ఇరాన్ యుద్ధం వల్ల చమురు ధరలు పెరగడం కూడా పార్టీకి ఇబ్బంది కలిగించిందని ఆయన అంగీకరించారు.

వలస విధానంలో కొన్ని అంశాలు లాభించాయని, కొన్ని నష్టపెట్టాయని ట్రంప్ విశ్లేషించారు. సరిహద్దులు మూసివేయడం, నేరస్తులను దేశం నుంచి పంపించడం తనకు మంచి మార్కులే తెచ్చిపెట్టాయని అన్నారు. కానీ చట్టవిరుద్ధంగా అమెరికాలోకి వచ్చినా, మంచి ఉద్యోగాలు చేస్తూ పన్నులు చెల్లిస్తున్న వారిని కూడా పంపించేయడం ఎన్నికల్లో నష్టం చేసిందని ఆయన అభిప్రాయపడ్డారు.

ఇరాన్ యుద్ధం వల్ల గ్యాస్ ధరలు పెరగడం, ఇజ్రాయెల్ పై ఉన్న వ్యతిరేకత కూడా రిపబ్లికన్ల ఓటమికి కారణాలని ట్రంప్ పేర్కొన్నారు. రాబోయే రోజుల్లో వలస విధానంపై డెమోక్రటిక్ పార్టీతో కలిసి పని చేసేందుకు తాను సిద్ధమని ఆయన ప్రకటించారు.

ఇరాన్ విషయంలో యుద్ధాన్ని ముగించే ఒప్పందం కోసం ప్రయత్నాలు జరుగుతున్నాయని ట్రంప్ తెలిపారు. ఒప్పందం కుదిరి హోర్ముజ్ జలసంధి తిరిగి తెరుచుకుంటే, మళ్లీ ఆ దేశంపై దాడులు జరిగే అవకాశం చాలా తక్కువని చెప్పారు. చర్చలు విఫలమైతే మాత్రం దాడులకు వెనకాడబోమని హెచ్చరించారు. తమ వద్ద మూడు విమాన వాహక నౌకలు సిద్ధంగా ఉన్నాయని, గంటల వ్యవధిలో ఇరాన్‌లో 38 వంతెనలను ధ్వంసం చేయగలమని ఆయన పేర్కొన్నారు.