దీపావళి టపాసుల ప్రభావం: హైదరాబాద్ గాలి నాణ్యత 160 పాయింట్లకు పడిపోయింది

దీపావళి రోజు హైదరాబాద్‌లో పెద్ద ఎత్తున టపాసులు కాల్చడంతో నగరంలో గాలి నాణ్యత తగ్గిపోయింది. ఎయిర్ క్వాలిటీ ఇండెక్స్ (AQI) 160 పాయింట్లుగా నమోదైంది.

సాధారణంగా AQI 100 పాయింట్ల లోపు ఉంటే ఆరోగ్యానికి ఎలాంటి ఇబ్బంది ఉండదు. 100 దాటితే ఆస్తమా ఉన్నవారికి ఇబ్బంది మొదలవుతుంది. 150 దాటితే ఆ ఇబ్బంది తీవ్రమవుతుంది. ప్రస్తుతం 160 పాయింట్లు నమోదు కావడంతో ఆస్తమా, ఊపిరిత్తుల సమస్యలు ఉన్నవారికి ఇబ్బంది ఎక్కువగా ఉంటుందని తెలుస్తోంది.

కాలుష్యం పెరగడానికి పలు కారణాలు ఉన్నాయి. హైదరాబాద్‌లో రోజూ సుమారు 90 లక్షల వాహనాలు రోడ్లపై తిరుగుతున్నాయి. ఇందులో బైకులు, కార్లు, ఆటోలు, ట్రక్కులు, బస్సులు ఉన్నాయి. ఈ వాహనాల నుంచి కార్బన్ మోనాక్సైడ్ విడుదలవుతోంది. నగరం చుట్టూ పలు పారిశ్రామిక ప్రాంతాలు కూడా ఉన్నాయి. వాటి నుంచి వచ్చే కాలుష్యం కూడా గాలిలో కలుస్తోంది.

ఈ నేపథ్యంలో నిపుణులు హెచ్చరికలు జారీ చేస్తున్నారు. చిన్న పిల్లలు, వృద్ధులు, శ్వాసకోశ సమస్యలు ఉన్నవారు అప్రమత్తంగా ఉండాలని సూచిస్తున్నారు. అవసరమైన జాగ్రత్తలు తీసుకోవాలని కూడా చెబుతున్నారు. చలికాలం రావడంతో కాలుష్యం మరింత పెరిగే అవకాశం ఉందని హెచ్చరిస్తున్నారు.

కాలుష్యాన్ని తగ్గించేందుకు కొన్ని చర్యలు సూచిస్తున్నారు. ఎలక్ట్రిక్ వాహనాల వాడకం పెంచాలని, పబ్లిక్ ట్రాన్స్‌పోర్ట్‌ను ఎక్కువగా వాడాలని చెబుతున్నారు. రోడ్లపై వాహనాల సంఖ్య తగ్గించాల్సిన అవసరం ఉందని అభిప్రాయపడుతున్నారు. ఈ అంశంపై ఢిల్లీ ప్రభుత్వం odd-even పద్ధతిని అమలు చేస్తోంది. అదే తరహా చర్యలను ఇక్కడ కూడా తీసుకోవాలని సూచిస్తున్నారు.