ఢిల్లీలో దీపావళి సమయంలో గాలి నాణ్యత ప్రమాద స్థాయికి చేరింది

ఢిల్లీలో దీపావళి సమయంలో గాలి నాణ్యత ప్రమాదకర స్థాయికి చేరింది. నవంబర్ 7న నగర సగటు AQI 369గా నమోదైంది. ప్రస్తుతం ఇది 384కి పెరిగింది.

కొన్ని ప్రాంతాల్లో పరిస్థితి మరింత దారుణంగా ఉంది. జహంగీర్‌పురిలో 450, పంజాబీ బాగ్‌లో 449, ఆర్‌కే పురంలో 448 నమోదయ్యాయి. భవానాలో 446, ఐఐటీ ఢిల్లీ పరిసరాల్లో 445గా ఉంది.

కాలుష్యానికి దీపావళి ఒక్కటే కారణం కాదు. వాహనాల పొగ, నిర్మాణ పనుల దుమ్ము, పరిశ్రమల ఉద్గారాలు, చెత్తను బహిరంగంగా కాల్చడం, పంట వ్యర్థాల దహనం కూడా కారణాలుగా ఉన్నాయి. నవంబర్ 7న నమోదైన PM2.5 కాలుష్యంలో 65 శాతం ఢిల్లీ వెలుపలి ప్రాంతాల నుంచి వచ్చింది. స్థానిక వాటా 35 శాతం.

ఈ నేపథ్యంలో ఎయిర్ క్వాలిటీ మేనేజ్‌మెంట్ కమిషన్ GRAP మూడో దశ ఆంక్షలను అమల్లోకి తెచ్చింది. ఢిల్లీతో పాటు NCR ప్రాంతాలకు ఇవి వర్తిస్తాయి. నిర్మాణ, కూల్చివేత పనులపై నిషేధం విధించారు. తవ్వకాలు, మట్టి పనులు, రోడ్డు నిర్మాణం, భారీ మరమ్మతులకు బ్రేక్ పడింది. అత్యవసర మౌలిక వసతుల ప్రాజెక్టులకు మాత్రం నిబంధనలతో మినహాయింపు ఉంది. BS-III పెట్రోల్, BS-IV డీజిల్ లైట్ మోటార్ వాహనాల రాకపోకలపై కూడా ఆంక్షలు విధించారు. రోడ్లపై నీరు చల్లడం, చెత్త దహనంపై నిఘా పెంచారు.

బాణసంచా విషయంలో సుప్రీం కోర్టు ఆదేశాల మేరకు గ్రీన్ క్రాకర్స్‌కే అనుమతి ఉంది. నవంబర్ 7, 8 తేదీల్లో ఉదయం 6 నుంచి 7 గంటల వరకు, రాత్రి 8 నుంచి 10 గంటల వరకు మాత్రమే కాల్చవచ్చు. ఆ తర్వాత పూర్తి స్థాయి నిషేధం అమల్లోకి రానుంది. నిబంధనలు పాటిస్తున్నారా లేదా అని ప్రతి ప్రాంతంలో పర్యవేక్షించడం పోలీసులకు సవాలుగా మారింది. ప్రజలే స్వచ్ఛందంగా నియమాలు పాటించాలని అధికారులు సూచిస్తున్నారు.

PM2.5 వంటి సూక్ష్మ ధూళి కణాలు శ్వాసతో పాటు ఊపిరితిత్తుల్లోకి చేరతాయి. దీంతో ఆరోగ్య సమస్యల ప్రమాదం పెరుగుతుంది. చిన్నారులు, వృద్ధులు, గర్భిణులు, ఆస్తమా, గుండె, ఊపిరితిత్తుల సమస్యలు ఉన్నవారికి ఎక్కువ ప్రభావం ఉంటుంది. బయటకు వెళ్లే సమయాన్ని తగ్గించాలని నిపుణులు సూచిస్తున్నారు. అధిక కాలుష్యం ఉన్న వేళల్లో వ్యాయామం చేయకూడదు. అవసరమైతే సరైన ఫిట్ ఉన్న N95 మాస్క్ ధరించాలి. గాలి నాణ్యత మరింత దిగజారితే ఇంటి లోపలే ఉండడం మంచిదని వైద్యులు చెప్తున్నారు.