హైదరాబాద్ వెస్ట్ సిటీలో ట్యాంకర్ సమ్మె.. హాస్టళ్లలో నీటి కొరత

హైదరాబాద్ వెస్ట్ సిటీలో ప్రైవేట్ వాటర్ ట్యాంకర్ల సమ్మె రెండు రోజుల పాటు కొనసాగింది. దీనివల్ల హాస్టళ్లు, IT ఉద్యోగులు, విద్యార్థులు తీవ్ర ఇబ్బందులు పడ్డారు. సమ్మె ముగిసిన తర్వాత నీటి సరఫరా తిరిగి ప్రారంభమైంది. కానీ నీటి కొరతపై ఆందోళనలు ఇంకా ఉన్నాయి.

మాదాపూర్, గచ్చిబోలి, కొండాపూర్, రాయదుర్గం, నానక్రామంగూడా ఫైనాన్షియల్ డిస్ట్రిక్ట్ ప్రాంతాల్లో వేలాది మంది ఉద్యోగులు, విద్యార్థులు నివసిస్తున్నారు. ఈ ప్రాంతంలో 3,000 నుంచి 4,000 ప్రైవేట్ హాస్టళ్లు, పీజీలు ఉన్నాయి. 100 మంది ఉండే హాస్టల్‌కు రోజుకు 20,000 లీటర్ల నీరు అవసరం అవుతుంది. జలమండలి సరఫరా ఆ అవసరాలకు సరిపోవడం లేదని నిర్వాహకులు చెప్తున్నారు.

రెండు రోజుల పాటు ట్యాంకర్లు రాకపోవడంతో హాస్టళ్లలో నీటి నిల్వలు తగ్గిపోయాయి. స్నానం, వాష్‌రూమ్ అవసరాలకు కూడా నీళ్లు లేకపోయాయి. ఒక్కొక్కరికి కనీసం ఒక బకెట్ నీళ్లు ఇవ్వలేని పరిస్థితి ఏర్పడింది. కొన్ని హాస్టళ్లలో యజమానులు ఒక్కొక్కరికి రెండు బకెట్లు ఇచ్చారని విద్యార్థులు, ఉద్యోగులు తెలిపారు. IT ఆఫీసులకు వెళ్లడానికి ఆలస్యమైందని వారు చెప్పారు.

నగరానికి అవసరమయ్యే నీటిలో 20% సింగూరు నుంచి వస్తుంది. ప్రస్తుతం రోజుకు 120 MGD నీటిని సరఫరా చేస్తున్నట్లు సమాచారం. వర్షాభావం, పెరుగుతున్న వినియోగంతో జలాశయంలో నీటి నిల్వలు తగ్గుతున్నాయని ఆందోళన ఉంది. ప్రైవేట్ ట్యాంకర్ల సరఫరాపై HYDRAA విధించిన ఆంక్షలు భారంగా మారుతున్నాయని హాస్టల్ నిర్వాహకులు అంటున్నారు. నీటి కొరతతో పాటు ట్యాంకర్ ఖర్చులు పెరగడంతో వినియోగాన్ని 50% వరకు తగ్గించాలని వారు నిర్ణయించారు.

సమ్మె ముగిసిన తర్వాత ట్యాంకర్లు తిరిగి రావడం మొదలైంది. బయట ట్యాంకర్ల సంఖ్య పెరుగుతోందని, రాబోయే రోజుల్లో సరఫరా మెరుగుపడవచ్చని నిర్వాహకులు చెప్తున్నారు. అయితే భూగర్భ జలాలు పడిపోవడం, సింగూరుపై ఒత్తిడి, IT కారిడార్ విస్తరణతో నీటి డిమాండ్ పెరగడం వంటి సమస్యలు మిగిలే ఉన్నాయి. నీటిని పొదుపుగా వాడాలని విద్యార్థులు, ఉద్యోగులు చెప్తున్నారు.