పల్నాడు చేజర్ల కపోతేశ్వరాలయం: శిబి చక్రవర్తి కథ, ఏనుగు ఆకార నిర్మాణం

పల్నాడు జిల్లాలోని చేజర్ల కపోతేశ్వరాలయంలో కార్తీక మాసంలో భక్తుల రద్దీ పెరిగింది. నరసరావుపేట నుంచి పిడుగురాళ్ల మార్గంలో సుమారు 30 కిలోమీటర్ల దూరంలో ఈ ఆలయం ఉంది. ఇక్కడి శివలింగాన్ని దర్శించుకోవడానికి భక్తులు క్యూ కడుతున్నారు.

స్థల పురాణం ప్రకారం, శిబి చక్రవర్తి దాన గుణాన్ని పరీక్షించాలని త్రిమూర్తులు నిర్ణయించారు. ఆయన 100వ యజ్ఞం చేస్తున్న సమయంలో వారు ఆ ప్రాంతానికి వచ్చారు. బ్రహ్మ కపోతం రూపంలో, శివుడు వేటగాడి రూపంలో, విష్ణువు బాణం రూపంలో వచ్చారని చెబుతారు.

శివుడు ప్రయోగించిన బాణం తగిలి కపోతం శిబి చక్రవర్తి ఒడిలో పడింది. దాన్ని కాపాడాలని ఆయన నిశ్చయించుకున్నారు. అయితే వేటగాడు తన ఆహారమైన కపోతాన్ని ఇవ్వాలని కోరాడు. శిబి చక్రవర్తి తన శరీరం నుంచి మాంసాన్ని కోసి త్రాసులో పెట్టారు. ఎంత మాంసం పెట్టినా కపోతం బరువు తూగలేదు. చివరికి తన తలతో సహా పూర్తి శరీరాన్ని ఇవ్వడానికి ఆయన సిద్ధపడ్డారు. అప్పుడు త్రిమూర్తులు ప్రత్యక్షమై ఆయన దాన గుణాన్ని మెచ్చుకున్నారని, అక్కడ ఉన్న వారందరికీ మోక్షం ప్రసాదించారని చెబుతారు.

ఇక్కడి శివలింగం సాధారణ ఆకారంలో లేదు. ఇది నాలుగు పలకల ఆకారంలో ఉంటుంది. దానిపై గుంటలు కనిపిస్తాయి. శిబి చక్రవర్తి తన మాంసాన్ని కోసి ఇచ్చినందుకు నిదర్శనంగానే ఈ గుంటలను భక్తులు భావిస్తారు. ఆలయ నిర్మాణాన్ని వెనుక వైపు నుంచి చూస్తే ఏనుగు ఆకారంలో కనిపిస్తుంది. ఇది మొదట బౌద్ధాలయంగా ఉండి, తర్వాత శివాలయంగా మారిందని కూడా చెబుతారు.

1958లో ఈ ఆలయాన్ని కేంద్ర పురావస్తు శాఖ ఆధీనంలోకి తీసుకుంది. ఆలయ నిర్మాణ శైలి ఇందుకు కారణం. అప్పటి నుంచి పురావస్తు శాఖే దీన్ని పర్యవేక్షిస్తోంది. ఆలయ అభివృద్ధి పనులకైనా ఆ శాఖ అనుమతి తీసుకోవాల్సి ఉంటుంది.

శిబి చక్రవర్తి యజ్ఞం చేసిన ప్రాంతం కావడంతో భక్తులు, ప్రముఖులు ఇక్కడ యజ్ఞ యాగాదులు చేస్తుంటారు. తమ కోరికలు ఫలించాలని కోరుతూ వచ్చి పూజలు చేస్తుంటారు. కార్తీక మాసంలో భక్తులు పెద్ద సంఖ్యలో వచ్చి శివలింగాన్ని దర్శించుకుంటున్నారు.