అనంతపురం కళ్యాణదుర్గంలో ఎలుగుబంటి సంచారం.. ఒకరిని తరిమికొట్టింది

అనంతపురం జిల్లా కళ్యాణదుర్గం పట్టణంలో ఎలుగుబంటి సంచరించింది. తెల్లవారుజామున పాత బస్ స్టాండ్ ప్రాంతంలో ఎలుగుబంటి ఒక వ్యక్తిని వెంబడించింది.

ఆ వ్యక్తి పాత బస్ స్టాండ్ నుంచి సమీపంలోని పెట్రోల్ బంక్ వరకు పరుగెత్తాడు. తృటిలో ఎలుగుబంటి నుంచి తప్పించుకుని పెట్రోల్ బంక్ లోకి వెళ్లి ప్రాణాలు దక్కించుకున్నాడు. ఈ దృశ్యాలు సమీపంలోని CCTV కెమెరాల్లో రికార్డ్ అయ్యాయి.

పట్టణంలోని ప్రధాన కూడలి టీ సర్కిల్, మార్కెట్ ప్రాంతంలో ఎలుగుబంటి కనిపించింది. దీంతో స్థానికులు భయాందోళనకు గురయ్యారు. పట్టణం నడిబొడ్డున ఎలుగుబంటి సంచరించడంపై వారు ఆందోళన వ్యక్తం చేస్తున్నారు.

కళ్యాణదుర్గం చుట్టుపక్కల కొండలు ఎక్కువగా ఉన్నాయి. అటవీ ప్రాంతంలో సరైన నీటి సౌకర్యం లేకపోవడంతో ఎలుగుబంట్లు, చిరుతలు జనావాసాల్లోకి వస్తున్నాయని స్థానికులు చెప్తున్నారు.

ఎలుగుబంటిని గుర్తించి బంధించాలని స్థానికులు అటవీ శాఖ అధికారులను కోరుతున్నారు. ఇలాంటి ఘటనలు పునరావృతం కాకుండా చర్యలు తీసుకోవాలని కూడా వారు విజ్ఞప్తి చేస్తున్నారు.