జార్ఖండ్లో పరీక్షా పేపర్ లీకేజీపై యువత ఆందోళన: ప్రభుత్వంతో చర్చలు విఫలం

జార్ఖండ్‌లో ఉద్యోగ నియామక పరీక్షల పేపర్ లీకేజీపై ఆందోళన చేస్తున్న యువతతో హేమంత్ సోరెన్ ప్రభుత్వం జరిపిన చర్చలు విఫలమయ్యాయి. తమ డిమాండ్లు నెరవేరే వరకు నిరసన కొనసాగుతుందని ఆందోళనకారులు స్పష్టం చేశారు.

ఏడు రోజులుగా నిరవధిక నిరాహార దీక్ష చేస్తున్న జెఎల్‌కేఎం నాయకుడు దేవేంద్రనాథ్ మహతోతో పాటు కాంగ్రెస్ మద్దతు ఉన్న ఎన్‌ఎస్‌యు‌ఐ, ఏసి‌ఎస్, జేసి‌ఎం ప్రతినిధి బృందాలతో మంత్రులు దీపికా పాండే సింగ్, సుదివ్య కుమార్, సంజయ ప్రసాద్ యాదవ్ చర్చలు జరిపారు. ఈ సమస్య పరిష్కారానికి ప్రభుత్వం సానుకూలంగా ఉందని మంత్రులు తెలిపారు. యువత డిమాండ్లను ముఖ్యమంత్రి హేమంత్ సోరెన్ దృష్టికి తీసుకెళ్తామని మంత్రి సంజయ ప్రసాద్ యాదవ్ చెప్పారు.

నిరాహార దీక్షతో మహతో ఆరోగ్యం క్షీణించింది. అతని బీపి, షుగర్ స్థాయిలు పడిపోతున్నాయని, ఛాతిలో ఇన్ఫెక్షన్ ఉన్నందున ఆసుపత్రికి తరలించాలని వైద్యులు సూచించినట్లు మంత్రులు తెలిపారు.

రిక్రూట్మెంట్ ప్రక్రియలో సంస్కరణలపై అభ్యర్థుల నుంచి సూచనలు స్వీకరించేందుకు ప్రభుత్వం ఒక ఈమెయిల్ ఐడిని అందుబాటులోకి తెచ్చింది. ఇప్పటివరకు జేపీఎస్సీ పరీక్షల అక్రమాలకు సంబంధించి 19 మందిని అరెస్ట్ చేశామని, ఏజెన్సీ మాజీ చైర్మన్ ఎల్ కియాటేను నాలుగు సార్లు ప్రశ్నించామని అధికారులు వెల్లడించారు.