యూపీఏ హయాంలో ఎన్నో పేపర్ లీకులు: రాజ్యసభలో మంత్రి జితేంద్ర సింగ్ వెల్లడి

పబ్లిక్ ఎగ్జామినేషన్స్ (అన్‌ఫెయిర్ మీన్స్ నివారణ) సవరణ బిల్లు-2026పై రాజ్యసభలో జరిగిన చర్చలో కేంద్ర మంత్రి జితేంద్ర సింగ్ గత ప్రభుత్వాల హయాంలో దేశవ్యాప్తంగా చోటు చేసుకున్న పేపర్ లీక్ సంఘటనలను వివరించారు. ఈ బిల్లు విద్యార్థుల భవిష్యత్తుకు భరోసా కల్పించేందుకు ఎంతగానో అవసరమని ఆయన పేర్కొన్నారు.

2009 రైల్వే రిక్రూట్‌మెంట్ బోర్డు లీక్ నుంచి ఇటీవలి కర్ణాటక వెటర్నరీ అధికారుల నియామకం వరకు రాష్ట్రాలు, పార్టీలతో నిమిత్తం లేకుండా అనేక ఉదాహరణలు ఉన్నాయన్నారు. 2011 ఆల్ ఇండియా ఇంజనీరింగ్ ఎంట్రెన్స్, 2012 ఎయిమ్స్ ఢిల్లీ ప్రవేశ పరీక్ష, 2013 మహారాష్ట్ర హయ్యర్ సెకండరీ, 2010 యూపీ బీఎడ్, 2014 యూపీ ప్రీమెడికల్, 2012 తమిళనాడు పబ్లిక్ సర్వీస్, 2009 వెస్ట్ బెంగాల్ జేఈఈ, 2018 రాజస్థాన్ పోలీస్ కానిస్టేబుల్, 2022 ఆర్పీఎస్సీ లెక్చరర్, ఒడిశా టీచర్స్ ఎలిజిబిలిటీ టెస్ట్, జార్ఖండ్ పబ్లిక్ సర్వీస్ కమిషన్, పంజాబ్ ఫార్మసీ ఆఫీసర్ లీకులను ఆయన ప్రస్తావించారు.

కొత్త సవరణలో కీలక మార్పులు తీసుకొచ్చామని మంత్రి తెలిపారు. పరీక్షల్లో అవకతవకలకు ప్రస్తుతం ఉన్న 3-5 ఏళ్ల జైలు శిక్షను 5-10 ఏళ్లకు పెంచారు; జరిమానా రూ.10 లక్షల నుంచి రూ.50 లక్షలకు పెంపు. సర్వీస్ ప్రొవైడర్లు తప్పు చేస్తే రూ.5 కోట్ల జరిమానా, పదేళ్ల వరకు పరీక్షల నిర్వహణ నిషేధం విధించే అవకాశం కల్పించారు. ఆర్గనైజ్డ్ క్రైమ్ ముఠాలకు 7-10 ఏళ్ల జైలు శిక్ష, రూ.10 కోట్ల జరిమానా నిర్ణయించారు.

ఇప్పటికే ఢిల్లీ, ముంబై, కోల్‌కతా, మధ్యప్రదేశ్, బీహార్, ఉత్తరాఖండ్‌లో ఆరు ప్రత్యేక ఫాస్ట్ ట్రాక్ కోర్టులు ఏర్పాటు చేసి విచారణ ప్రారంభించామని చెప్పారు. నూతన నిబంధనల ప్రకారం దర్యాప్తు 2 నెలల్లో, ట్రయల్ 3 నెలల్లో పూర్తి చేయాలి. నీల్కేని, ఇస్రో మాజీ ఛైర్మన్ సోమనాథ్ తదితర నిపుణులతో ఒక టాస్క్‌ఫోర్స్ కూడా ఏర్పాటు చేశామన్నారు.

నేషనల్ టెస్టింగ్ ఏజెన్సీ ఏర్పాటు ప్రతిపాదన 1992లోనే కాంగ్రెస్ ప్రభుత్వ కమిటీ నుంచి వచ్చిందని, 2010లో యూపీఏ హయాంలో మరోసారి సిఫారసు అయిందని ఆయన గుర్తు చేశారు. అయితే దాన్ని కార్యరూపం దాల్చింది ప్రస్తుత ఎన్డీఏ ప్రభుత్వమేనని పేర్కొన్నారు. లోక్‌సభ ఆమోదించిన ఈ బిల్లు త్వరలో రాజ్యసభలో ఓటింగ్‌కు రానుంది.