ఆషాఢ శుక్రవారం: జోగులాంబ ఆలయంలో శాకాంబరి అలంకారం

జోగులాంబ గద్వాల జిల్లా అలంపురంలోని శ్రీ జోగులాంబ ఆలయంలో శుక్రవారం అమ్మవారికి శాకాంబరి అలంకారం జరిగింది. ఆషాఢ మాసం సందర్భంగా ఈ ప్రత్యేక పూజలు నిర్వహించినట్లు ఆలయ వర్గాలు తెలిపాయి.

అర్చకులు అమ్మవారిని వివిధ రకాల పండ్లు, కూరగాయలు, పూలతో అలంకరించారు. భక్తులు భారీగా తరలివచ్చి కుంకుమార్చన, త్రిషతి ఖడ్గమాల పూజలు చేశారు. ఆలయ ప్రాంగణంలో ప్రత్యేక పూజా కార్యక్రమాలు కొనసాగాయి.

పురాణాల ప్రకారం, ఒకప్పుడు కరువుతో సృష్టి అల్లాడుతుండగా ఋషులు అమ్మవారిని ప్రార్థించగా, ఆమె శాకాంబరి దేవిగా అవతరించి కూరగాయలతో ఆకలి తీర్చినట్లు చెబుతారు. అందుకే ప్రతి ఆషాఢ మాసంలో ఈ అలంకారం చేస్తారు.

తెలంగాణలో ప్రస్తుతం వర్షాభావం నెలకొని రైతులు, ప్రజలు ఇబ్బంది పడుతున్న నేపథ్యంలో, రాష్ట్రం, దేశం సుభిక్షంగా ఉండాలని భక్తులు ప్రత్యేక ప్రార్థనలు చేశారు. ఐదవ శక్తిపీఠమైన ఈ క్షేత్రాన్ని సందర్శించాలని ఆలయ అధికారులు విజ్ఞప్తి చేశారు.