కాకినాడలో దీపావళి టపాసుల షాపులు: ధరలు దాదాపు రెట్టింపు

కాకినాడలో దీపావళి టపాసుల కొనుగోలు కొనసాగుతోంది. ఈ సారి ధరలు గత సంవత్సరంతో పోలిస్తే దాదాపు రెట్టింపు అయ్యాయని వ్యాపారులు, కొనుగోలుదారులు చెప్తున్నారు.

పండుగ నేపథ్యంలో మూడు రోజులుగా కాకినాడలో టపాసుల షాపులు ఏర్పాటు చేశారు. ఇక్కడ దాదాపు 110 షాపులు ఉన్నాయి. లక్షల రూపాయలు పెట్టుబడి పెట్టి వ్యాపారులు ఈ షాపులు వేసినట్టు నిర్వాహకులు తెలిపారు.

గతేడాది ₹500–700 లోపు దొరికిన సామగ్రి ఈ సారి ₹1,500–2,000 వరకు ఉందని ఒక విక్రేత చెప్పారు. ధరలు పెరగడానికి ప్రధాన కారణం తుఫాన్ల ప్రభావమని ఆయన తెలిపారు. గతేడాది ₹20కి దొరికిన ఒక నాటు టపాసు ఈ సారి ₹30కి కొనాల్సి వస్తోందని, బయట ₹32కి అమ్ముతున్నారని ఒక కొనుగోలుదారు అన్నారు.

గోదావరి జిల్లాల్లో నాటు టపాసుల తయారీ కేంద్రాల్లో అగ్నిప్రామాదాలు జరగడంతో స్థానికంగా తయారయ్యే టపాసులు తగ్గిపోయాయి. దీంతో బయటి నుంచి కంపెనీ టపాసులు తెప్పించాల్సి వస్తోంది. ఈ కారణంగానే ధరలు ఎక్కువగా ఉన్నాయని వ్యాపారులు చెప్తున్నారు.

గతంలో పట్టణం మధ్యలో ఉన్న ప్రాంతంలో షాపులు వేసేవారు. ఈ సారి ఊరి చివరకు షాపులు మార్చడంతో కొనుగోలుదారులకు ఇబ్బంది అవుతోందని కొందరు అంటున్నారు. కొన్ని రోడ్లు మూసేయడంతో రాకపోకలకూ ఇబ్బంది ఏర్పడిందని వారు తెలిపారు.

తుఫాన్ ప్రభావంతో చాలా చోట్ల ఇంకా నీరు తగ్గలేదని, జనం పట్టణం బయటకు రావడం తక్కువగా ఉందని షాపు నిర్వాహకులు చెప్తున్నారు. దీంతో అమ్మకాలు కొంత తగ్గాయని వారు అన్నారు. దీపావళి రోజు సాయంత్రం తర్వాత అమ్మకాలపై పూర్తి స్పష్టత వస్తుందని నిర్వాహకులు తెలిపారు.