ఇరాన్‌పై భూమార్గ దిగ్బంధానికి అమెరికా కొత్త టాస్క్ ఫోర్స్ ప్రకటన

హర్మూస్ జలసంధిలో ఇరాన్ ఓడరేవులపై నెలల తరబడి కొనసాగిస్తున్న సముద్ర దిగ్బంధాన్ని అమెరికా ఇప్పుడు భూమార్గాలకు విస్తరించింది. రోడ్డు మార్గాల ద్వారా ఇరాన్ ఆయుధాలు, ఇతర సామగ్రి రవాణా కాకుండా అడ్డుకునేందుకు 'టాస్క్ ఫోర్స్ ఐరన్ గేట్' పేరుతో ప్రత్యేక దళాన్ని ఏర్పాటు చేసినట్లు అమెరికా సెంట్రల్ కమాండ్ (CENTCOM) ప్రకటించింది.

ఈ టాస్క్ ఫోర్స్ కేంద్రం ఫ్లోరిడాలోని టంపా. ఇరాన్ భూ సరిహద్దులు, కాస్పియన్ సముద్రం మీదుగా అత్యాధునిక ఆయుధ వ్యవస్థలు, ద్వంద్వ ప్రయోజన సాంకేతికతలు, ఆంక్షలు విధించిన సామగ్రి రవాణా జరగకుండా అడ్డుకోవడం దీని లక్ష్యం. ఇతర అమెరికా ప్రభుత్వ సంస్థలతో కలిసి ఈ దళం పని చేస్తుంది.

ఆయుధ వ్యవస్థలు ఎక్కడి నుంచి వస్తున్నాయి, వాటిని ఎలా అడ్డుకోవచ్చు, ఇరాన్ తన ఇంధనాన్ని ఎలా రవాణా చేస్తోంది అనే విషయాలను గుర్తించడం ఈ దళం ప్రధాన పాత్ర అని అమెరికా తెలిపింది. సముద్ర దిగ్బంధన విజయానికి ఈ టాస్క్ ఫోర్స్ మరింత బలం చేకూరుస్తుందని CENTCOM కమాండర్ అడ్మిరల్ బ్రాడ్ కూపర్ తెలిపారు.

మరోవైపు శనివారం రాత్రి ఒమన్ గల్ఫ్‌లో సెయింట్ కిట్స్ జెండాతో ప్రయాణిస్తున్న M/V హుదా అనే వాణిజ్య కార్గో నౌకను నిర్వీర్యం చేసినట్లు అమెరికా ప్రకటించింది. ఇరాన్ ఓడరేవును సందర్శించిన ఆ నౌకకు పలుమార్లు హెచ్చరికలు జారీ అయినా అవి బేఖాతరు చేసి, ప్రాంతం నుంచి వెళ్లిపోయేందుకు ప్రయత్నించింది. నౌకలోని లక్షిత ప్రాంతాలను ఖాళీ చేయాలని సిబ్బందిని ఆదేశించిన తర్వాత, అమెరికా సైనిక విమానం కచ్చితమైన ఆయుధాలతో నౌక వెనుక భాగంపై దాడి చేసి కదలలేకుండా చేసింది. ఆ నౌకలోని 22 మంది సిబ్బందిని యూఏఈ కాపాడింది.

జూలై నుంచి చేపడుతున్న ఈ చర్యల్లో తమ ఆదేశాలను పాటించిన 147 వాణిజ్య నౌకలను దారి మళ్లించగా, ఆదేశాలను నిరాకరించిన ఐదు నౌకలను నిర్వీర్యం చేసినట్లు అమెరికా సైన్యం తెలిపింది.

శనివారం సాయంత్రం హర్మూస్ జలసంధిలోని ఖేష్మ్ ద్వీపం, జాస్క్ ఓడరేవు ప్రాంతంలో పలు పేలుళ్ల శబ్దాలు వినిపించినట్లు ఇరాన్ ప్రభుత్వ మీడియా తెలిపింది.

అమెరికా మధ్యంతర ఎన్నికల తర్వాత ఇరాన్‌పై కొత్త విడత దాడులు ప్రారంభించే అంశాన్ని పరిశీలిస్తున్నట్లు ట్రంప్ గత కొన్ని వారాలుగా చెబుతున్నారు. యుద్ధాన్ని మరింత తీవ్రతరం చేయాలని ఆయన ఆదేశిస్తే, ఈ లక్ష్యాలపైనే దాడులు జరిగే అవకాశం ఉంది.