జపాన్‌లో వరుస భూకంపాలు: సెంట్రల్ జపాన్‌లో రిక్టర్ స్కేల్‌పై 5.7 తీవ్రత

సెంట్రల్ జపాన్‌లో తెల్లవారుజామున రిక్టర్ స్కేల్‌పై 5.7 తీవ్రతతో భూకంపం సంభవించింది. భవనాలు ఊగిపోవడంతో గాఢ నిద్రలో ఉన్న ప్రజలు ఇళ్ల నుంచి బయటకు పరుగెత్తారు.

ఈ ఘటనలో 22 మంది గాయపడ్డారు. పలు దుకాణాల అద్దాలు పగిలిపోయాయి. షిజువోకా ప్రావిన్స్‌లో 40 కిలోమీటర్ల లోతులో భూకంప కేంద్రాన్ని అధికారులు గుర్తించారు.

జాగ్రత్త చర్యగా బుల్లెట్ రైలు వేగాన్ని తగ్గించి రాకపోకలు కొనసాగిస్తున్నారు. రాబోయే రోజుల్లో మరిన్ని ప్రకంపనలు వచ్చే అవకాశం ఉందని వాతావరణ శాఖ హెచ్చరించింది.

ఇది జరిగిన 24 గంటల్లోనే మరో భూకంపం కూడా వచ్చింది. కాంటో తీర ప్రాంతానికి సమీపంలో పసిఫిక్ సముద్రంలో రిక్టర్ స్కేల్‌పై 6.1 తీవ్రతతో భూకంపం సంభవించింది. టోక్యోకు ఆగ్నేయంగా 169 కిలోమీటర్ల దూరంలో, సుమారు 10 కిలోమీటర్ల లోతులో భూకంప కేంద్రం ఉందని జపాన్ వాతావరణ సంస్థ, అమెరికా భూగర్భ పరిశోధన సంస్థ (USGS) తెలిపాయి.

ఈ ప్రకంపనల ప్రభావం టోక్యోతో పాటు మియాగీ, ఫుకుషిమా, ఇబరాకి ప్రాంతాల్లో కూడా కనిపించింది. ఇళ్లలోని వస్తువులు కదలడంతో ప్రజలు భయపడి వీధుల్లోకి పరుగెత్తారు. ఈ భూకంపాల వల్ల సునామీ ముప్పు లేదని అధికారులు స్పష్టం చేశారు. ప్రాథమిక సమాచారం ప్రకారం ఆస్తి, ప్రాణనష్టం జరగలేదని జపాన్ అధికారులు తెలిపారు.

జపాన్ పసిఫిక్ మహాసముద్రంలోని రింగ్ ఆఫ్ ఫైర్ ప్రాంతంలో ఉంది. ఈ ప్రాంతంలో భూకంపాలు తరచుగా వస్తుంటాయి.