ఫరీదాబాద్‌లో పార్కింగ్ వివాదం: మాజీ Tech Mahindra ఎగ్జిక్యూటివ్‌పై కాల్పులు, మృతి

ఫరీదాబాద్‌లోని సెక్టార్ 21C అపార్ట్‌మెంట్‌లో పార్కింగ్ వివాదం కారణంగా మాజీ Tech Mahindra సీనియర్ ఎగ్జిక్యూటివ్ పరమ్‌జీత్ ధన్‌ఖర్‌పై పొరుగువాడు కాల్పులు జరిపాడు. తొమ్మిది బుల్లెట్లు తగిలి ఆయన అక్కడికక్కడే మృతి చెందారు. శుక్రవారం రాత్రి జిమ్ నుంచి తిరిగి వచ్చిన ధన్‌ఖర్, తనకు కేటాయించిన పార్కింగ్ స్థలంలో పొరుగువాడు మోను శర్మ కారు నిలిపి ఉండటం గమనించారు. వాహనాన్ని తొలగించాలని ఆయన కోరడంతో వాగ్వాదం ముదిరింది. ఈ సమయంలో మోను శర్మ లైసెన్స్ ఉన్న పిస్టల్‌తో సుమారు 15 రౌండ్లు కాల్పులు జరిపాడని పోలీసులు తెలిపారు.

సింగపూర్‌లో ఉంటున్న ధన్‌ఖర్ నవంబర్ 5న భారత్‌కు తిరిగి వచ్చారు. ఈ నెలాఖరులో జరగనున్న మేనల్లుడి వివాహం కోసం ఆయన వచ్చారు. ఇద్దరూ ఒకే అపార్ట్‌మెంట్‌లో నివసిస్తున్నారు — ధన్‌ఖర్ మొదటి అంతస్తులో, మోను శర్మ మూడో అంతస్తులో. పార్కింగ్, అపార్ట్‌మెంట్ పార్కింగ్ ప్రాంతంలో పెంపుడు కుక్క విషయంలో ఇరు కుటుంబాల మధ్య గత కొంతకాలంగా వివాదం ఉంది.

ఘటన జరిగిన రోజు ఉదయం కూడా ఇరు పక్షాల మధ్య గొడవ జరిగి, అది స్థానిక పోలీస్ చౌకీకి చేరింది. సాయంత్రం మోను శర్మ ఇంటి గేటు వద్దకు వచ్చి వాహనం తొలగించాలని కోరాడు. ధన్‌ఖర్ కిందకు దిగి రాగా మళ్లీ వాగ్వాదం చెలరేగి కాల్పులు జరిగాయి. కాల్పుల అనంతరం నిందితుడు, అతని కుటుంబం ఘటనా స్థలం నుంచి వెళ్లిపోయారు. ధన్‌ఖర్ కుమారుడి ఫిర్యాదు మేరకు మోను శర్మ (మోహన్), అతని భార్య దివ్య, కుమారుడు మయాంక్, కుమార్తె నైనా, సోదరుడు హేతరామ్‌పై కేసు నమోదు చేశారు. శవాన్ని పోస్ట్‌మార్టం కోసం సివిల్ ఆస్పత్రికి తరలించారు.

నిందితుడిని క్రైమ్ బ్రాంచ్ 30 బృందం అదుపులోకి తీసుకుంది. ఘటనను అన్ని కోణాల నుంచి దర్యాప్తు చేస్తామని, నిందితుడికి కఠిన శిక్ష పడేలా చర్యలు తీసుకుంటామని పోలీసులు తెలిపారు. ఎలాంటి పక్షపాతం లేకుండా కఠిన శిక్ష పడాలని మృతుడి కుటుంబం కోరుతోంది. పోస్ట్‌మార్టం అనంతరం అంత్యక్రియలు నిర్వహించనున్నట్లు కుటుంబీకులు తెలిపారు.