కామారెడ్డిలో హోటళ్లపై ఫుడ్ సేఫ్టీ దాడులు: పలు లైసెన్సులు రద్దు

కామారెడ్డి జిల్లాలోని హోటళ్లు, రెస్టారెంట్లపై ఫుడ్ సేఫ్టీ అధికారులు మెరుపు తనిఖీలు చేశారు. నిబంధనలు ఉల్లంఘించిన పలు హోటళ్ల లైసెన్సులను రద్దు చేశారు. తీవ్ర ఉల్లంఘనలు జరిగిన కొన్ని హోటళ్లకు షోకాజ్ నోటీసులు ఇచ్చారు.

కామారెడ్డి పట్టణంలోని అల్లు సుభాన్ రెస్టారెంట్‌లో అధికారులు తనిఖీలు చేపట్టారు. వంటల తయారీలో అనుమతి లేని కృత్రిమ ఆహార రంగులు వాడుతున్నట్లు గుర్తించారు. వంటశాల అపరిశుభ్రంగా ఉందని, వ్యర్థాల నిర్వహణ సరిగా లేదని అధికారులు తెలిపారు. సిబ్బంది తల కవర్లు, చేతి తొడుగులు, ఏప్రాన్‌లు ధరించలేదని కూడా గుర్తించారు.

అక్కడ 15 కిలోల నిల్వ ఆహార పదార్థాలను అక్కడికక్కడే ధ్వంసం చేశారు. అనుమానిత నమూనాలను సేకరించి ప్రయోగశాలకు పంపారు. ఆహార భద్రత ప్రమాణాల చట్టం ప్రకారం సంబంధిత సంస్థకు నోటీసు జారీ చేశారు.

జిల్లాలోని పలు హోటళ్ల కిచెన్‌లలో బొద్దింకలు, ఈగలు, కుళ్లిన కూరగాయలు, ఫంగస్ పట్టిన ఆహార పదార్థాలు లభించినట్లు అధికారులు చెప్పారు. ప్రజారోగ్యాన్ని దృష్టిలో పెట్టుకుని ఏ హోటల్‌ను, రెస్టారెంట్‌ను ఉపేక్షించబోమని వారు హెచ్చరించారు.

తెలంగాణలో ఫుడ్ సేఫ్టీ అధికారులు వరుసగా తనిఖీలు నిర్వహిస్తున్నారు. రాబోయే రోజుల్లో తనిఖీలను మరింత ముమ్మరం చేస్తామని అధికారులు తెలిపారు.