కరీంనగర్‌లో వర్షానికి మునిగిన రోడ్లు, నివాసాలు; డ్రైనేజీ సమస్య పరిష్కారానికి రూ.130 కోట్ల ప్రణాళిక

కరీంనగర్‌లో భారీ వర్షం కురవడంతో పట్టణంలోని పలు ప్రాంతాలు నీట మునిగాయి. రోడ్లపై వరద నీరు చేరింది, లోతట్టు కాలనీల్లో ఇళ్లల్లోకి నీళ్లు చేరాయి.

జిల్లా కలెక్టరేట్, పోలీస్ కమిషనరేట్, సివిల్ ఆసుపత్రి, టూ టౌన్ పోలీస్ స్టేషన్, ఆర్టీసీ వర్క్షాప్, మంచిర్యాల చౌరస్తా, గీతా భవన్, వి పార్క్ హోటల్ ప్రాంతాలు తీవ్రంగా నీట మునిగాయి. 25-30 ఏళ్ల కింద నిర్మించిన మురికినీటి కాలువలు, స్ట్రామ్ వాటర్ డ్రైన్లు సరిగ్గా పనిచేయడం లేదు. సహజ ప్రవాహానికి అడ్డంకులు ఏర్పడి ఉండటంతో కేవలం 5 సెం.మీ. వర్షం పడినా వరద పరిస్థితి తలెత్తుతోంది.

నగరంలో సుమారు 624 కిలోమీటర్ల మేర డ్రైనేజీ నెట్వర్క్ ఉంది. కానీ నాలాల ఆక్రమణలు, నిర్వహణ లోపం కారణంగా ఇబ్బందులు తప్పడం లేదు. ఈ నేపథ్యంలో కేంద్రం నుంచి అర్బన్ ఛాలెంజ్ ఫండ్ కింద రూ.840 కోట్లు మంజూరు అయ్యాయని మేయర్ శ్రీనివాసరావు తెలిపారు. ఇందులో వరద సమస్య ఉన్న ప్రాంతాలకు రూ.130 కోట్లతో శాశ్వత పరిష్కారం చేపట్టనున్నట్లు వివరించారు. డీపీఆర్ సిద్ధం చేస్తున్నామని, రెండు నెలల్లో టెండర్లు పూర్తి చేసి పనులు ప్రారంభిస్తామని చెప్పారు.

ప్రతిపక్ష కాంగ్రెస్ పార్టీ సహజ ప్రవాహానికి అనుగుణంగా పెద్ద డ్రైనేజీ వ్యవస్థ నిర్మించాలని డిమాండ్ చేసింది. కేవలం ప్రకటనలతో ఆగకుండా త్వరితగతిన పనులు పూర్తి చేయాలని పట్టణవాసులు కోరుతున్నారు.