కరీంనగర్‌లో భూమి ఆక్రమణపై ఇద్దరు సోదరీమణుల నిరసన

కరీంనగర్ జిల్లా మానకొండూరు మండలం పోచంపల్లి గ్రామ పంచాయతీ కార్యాలయం ఎదుట ఇద్దరు సోదరీమణులు నిరసన తెలిపారు. తమ భూమిపై రాత్రికి రాత్రే ఇనుప షీట్లతో షెడ్ నిర్మించారని వారు ఆరోపించారు.

1994-95లో తమ కుటుంబానికి ప్రభుత్వం 20 గుంటల భూమి కేటాయించిందని వారు తెలిపారు. పద్మశాలి సంఘం ద్వారా ఈ భూమి తమ తల్లిదండ్రులకు అందిందన్నారు. తల్లిదండ్రులు మరణించగా నలుగురు సోదరీమణులు ఉంటున్నారని చెప్పారు. వీరిలో ఒకరు వికలాంగురాలు కాగా, నలుగురూ వివాహం చేసుకోలేదని వారు పేర్కొన్నారు.

భూమి హక్కును వికలాంగురాలైన పెద్ద సోదరి పేరుకు మార్చారని వారు తెలిపారు. ఆమె ఇటీవల మరణించింది. ఆ తర్వాత ఈ భూమిని ఆక్రమించారని వారు ఆరోపించారు. కొక్కుల లక్ష్మి, బూర పుష్ప తమ భూమిని ఆక్రమించారని, ప్రశ్నించగా దాడి చేశారని వారు మానకొండూరు పోలీసులకు ఫిర్యాదు చేశారు. కొమాకుల శంకరయ్య, చిరంజీవి తదితరులు కంచె, గుడి, టిన్ షెడ్ ఏర్పాటు చేసి భూమిని ఆక్రమించారని వారు ఆరోపించారు.

పోలీసులు వచ్చిన తర్వాత కూడా తమను కొట్టారని ఆ సోదరీమణులు చెప్పారు. తమను పోలీస్ స్టేషన్‌కు రమ్మన్నారని, అక్కడికి వెళ్లాక రేపు వస్తామని చెప్పి పంపించారని తెలిపారు. పోలీసులు ఇప్పటివరకు రాలేదని వారు ఆవేదన వ్యక్తం చేశారు. ప్రజావాణి కార్యక్రమంలో ఫిర్యాదు చేసినా అధికారులు స్పందించలేదని వారు చెప్పారు. ఈ భూమిపై కోర్టు కేసు నడుస్తోందని వారు తెలిపారు. షెడ్ తొలగించి తమకు న్యాయం చేయాలని వారు డిమాండ్ చేస్తున్నారు.

గ్రామంలో ఎవరు ఎవరో కూడా తమకు తెలియదని, 15 ఏళ్లుగా ఊరికి దూరంగా ఉన్నామని ఆ సోదరీమణులు అన్నారు. ఈ ఆరోపణలపై మానకొండూరు పోలీసులు, గ్రామ పంచాయతీ అధికారుల స్పందన లభ్యం కాలేదు.