కరీంనగర్‌లో నీటి కష్టాలు తీవ్రం: బోర్లు ఎండిపోతుండడంతో ట్యాంకర్లపై ప్రజల ఆధారం

కరీంనగర్ నగరంలో భూగర్భ జలాలు అడుగంటడంతో నీటి కొరత తీవ్రంగా ఉంది. వర్షాకాలం ప్రారంభమైనా తగినంత వర్షం కురవకపోవడంతో బోర్లు ఎండిపోతున్నాయి. మిషన్ భగీరథ ద్వారా అందే నీరు సరిపోకపోవడంతో ప్రజలు ట్యాంకర్లపై ఆధారపడాల్సి వస్తోంది.

కట్టరాంపూర్, కోతిరాంపూర్, పోచమ్మవాడ, లక్ష్మీ నగర్, కాపువాడ, గణేష్ నగర్, తిరుమల్ నగర్, భరత్ నగర్, హనుమాన్ నగర్, అలకాపూర్ ప్రాంతాల్లో పాత బోర్లు 250 అడుగుల లోతులో కూడా ఎండిపోయాయి. కొత్తగా 300 అడుగుల లోతు బోరు వేసినా చుక్క నీరు రావడం లేదు. కార్పొరేషన్ రెండు రోజులకు ఒకసారి పావు గంట నుండి అరగంట మాత్రమే నీటిని సరఫరా చేస్తోంది. దీంతో అనేక కుటుంబాలు ట్యాంకర్లపై ఆధారపడుతున్నాయి.

నగర పాలక సంస్థ ట్యాంకర్ నీటికి రూ.600 ముందస్తు బుకింగ్ చేసుకుంటే సరఫరా చేస్తోంది. ప్రైవేటు ట్యాంకర్లు 5000 లీటర్ల ట్యాంకర్‌కు రూ.800 నుండి రూ.1500 వసూలు చేస్తున్నాయని స్థానికులు చెబుతున్నారు. ట్యాంకర్లు కూడా సకాలంలో లభించడం లేదని వారు ఆవేదన వ్యక్తం చేస్తున్నారు.

కాలేజీ విద్యార్థులకు స్నానం చేయడానికి, పాఠశాలకు వెళ్లడానికి కూడా ఇబ్బందిగా ఉందని స్థానికులు తెలిపారు. కొన్ని కుటుంబాలు వేరే ఇళ్ల నుంచి నీళ్లు తెచ్చుకుంటున్నాయి. నీటి సమస్యపై అధికారుల దృష్టికి తీసుకెళ్లినా పరిష్కారం లేకపోవడంతో ప్రజలు తీవ్ర ఇబ్బందులు ఎదుర్కొంటున్నారు.

లోయర్ మానేరు డ్యామ్ లో ప్రస్తుతం 24 టీఎంసిల నీటి నిల్వ సామర్థ్యానికి కేవలం 5 టీఎంసిల నీటి నిల్వ మాత్రమే ఉంది. వర్షాలు కురిసి డ్యామ్ నిండకపోతే తాగునీటి కోసం మరింత కష్టాలు తప్పవని స్థానిక నాయకులు అంచనా వేస్తున్నారు. ట్యాంకర్ల సరఫరా పెంచేందుకు ప్రయత్నిస్తున్నామని, అధికారులతో చర్చించి సమస్య పరిష్కరించేలా చర్యలు తీసుకుంటామని వారు హామీ ఇచ్చారు. నీటి కొరతపై ప్రభుత్వం ప్రత్యేక చర్యలు చేపట్టాలని స్థానికులు కోరుతున్నారు.