28 ఏళ్లు కాలినడకన 29 దేశాలు చుట్టి సొంతూరు చేరిన కార్ల్ బుష్బీ

మాజీ బ్రిటిష్ పారాట్రూపర్ కార్ల్ బుష్బీ కేవలం కాలినడకనే 28 ఏళ్లు ప్రయాణించి తన సొంతూరు చేరుకున్నారు. ఏ మోటారు వాహనం, విమానం ఉపయోగించకుండా నాలుగు ఖండాలు, 29 దేశాల్లో సుమారు 31,000 మైళ్లు నడిచారు.

1998 నవంబర్ 1న దక్షిణ అమెరికాలోని చిలీ నుంచి ఆయన యాత్ర మొదలైంది. 57 ఏళ్ల బుష్బీ ఈ ప్రయాణాన్ని 12 ఏళ్లలో పూర్తి చేయాలని భావించారు. కానీ వీసా సమస్యలు, మారుతున్న సరిహద్దుల వల్ల అది దాదాపు మూడు దశాబ్దాలకు సాగింది.

ఈ యాత్రలో ఆయన అనేక ప్రాణాంతక పరిస్థితులను ఎదుర్కొన్నారు. కొలంబియా అడవుల్లో గెరిల్లా ప్రాంతాలను దాటారు. పెరూలో మూకదాడి నుంచి ప్రాణాలతో బయటపడ్డారు. ఆర్కిటిక్‌లో ధ్రువపు ఎలుగుబండి దాడిని తట్టుకున్నారు. పనామాలో జైలు శిక్ష అనుభవించారు. రష్యాలో వీసా నిబంధనల కోసం ఏళ్ల తరబడి పోరాడారు.

అనుమతి నిరాకరించడంతో ఇంగ్లిష్ ఛానల్‌ను దాటేందుకు ఆయన 20 గంటల పాటు సముద్రంలో ఈత కొట్టారు. ఎడారులు, టండ్రా ప్రాంతాల్లో వేలాది మైళ్లు ఒంటరిగా నడిచారు.

చివరకు తన సొంతూరు ఇంగ్లాండ్‌లోని హల్ నగరానికి చేరుకున్నారు. ప్రపంచవ్యాప్తంగా ఎంతో మంది మంచి మనసున్న సాధారణ ప్రజలను కలుసుకున్నానని ఆయన చెప్పారు. దీంతో మానవత్వంపై తనకున్న నమ్మకం పెరిగిందని తెలిపారు.