కర్ణాటకలో 7 వేల మంది విద్యార్థులకు HIV పాజిటివ్; అవగాహన డ్రైవ్ ప్రారంభం

కర్ణాటక ప్రభుత్వం నిర్వహించిన పైలట్ పరీక్షల్లో 7,000 మంది విద్యార్థులు HIV పాజిటివ్గా తేలారు. జాతీయ AIDS నివారణ సంస్థ (NACO) హెచ్చరిక మేరకు ఈ పరీక్షలు చేపట్టారు. పాఠశాలలు, కాలేజీలు, విశ్వవిద్యాలయాల్లో విద్యార్థులను పరీక్షించగా ఈ ఫలితాలు వచ్చాయి.

18-35 ఏళ్ల వయసు ఉన్నవారిలో HIV కేసులు ఎక్కువగా ఉన్నట్లు NACO నివేదిక తెలిపింది. కర్ణాటకలో సుమారు 2.6 లక్షల మంది AIDS రోగులు ఉన్నారు. అందులో 54 వేల మందికి వ్యాధి సోకిన విషయం తెలియదని ఆ నివేదిక పేర్కొంది. ఈ నేపథ్యంలో రాష్ట్ర ప్రభుత్వం విద్యాసంస్థల్లో ప్రత్యేక అవగాహన డ్రైవ్ ప్రారంభించింది.

ప్రభుత్వం జారీ చేసిన ఆదేశాల ప్రకారం విద్యార్థులకు HIV లక్షణాలు, నివారణ పద్ధతులపై ప్రత్యేక తరగతులు నిర్వహించాలి. HIV సోకిన వారికి మానసిక స్థైర్యం కల్పించడంపైనా దృష్టి పెట్టాలని అధికారులను కోరారు. ఇటువంటి అవగాహన కార్యక్రమాలను ప్రతి రెండు నెలలకు ఒకసారి నిర్వహించాలని సూచించారు.

యువతలో HIV వ్యాప్తి పెరగడంతో ఈ చర్యలు తీసుకున్నట్లు అధికార వర్గాలు తెలిపాయి. పైలట్ ప్రాజెక్ట్ ఫలితాలతో ప్రభుత్వం మరింత అప్రమత్తమైంది. కేవలం ఒకసారి కాకుండా నిరంతరం ఈ పరీక్షలు, అవగాహన కార్యక్రమాలు కొనసాగించాలని నిపుణులు సూచిస్తున్నారు.