పెరియార్ స్వాభిమాన వివాహ విధానంలో కావ్య మారన్-అనిరుద్ వివాహం

తమిళనాడులో స్వాభిమాన వివాహ విధానంలో కావ్య మారన్, అనిరుద్‌ల వివాహం జరిగింది. ఈ వేడుకలో సంప్రదాయ మంత్రాలు, అగ్నిసాక్షిగా జరిగే తంతులకు తావు లేదు.

వధూవరులు ఇద్దరూ ఒకరికొకరు పూలమాలలు మార్చుకున్నారు. DMK అధినేత ఎంకే స్టాలిన్ కావ్య మారన్‌కు ఒక గొలుసును అందించారు. నటుడు రజినీకాంత్ అనిరుద్‌కు మరో గొలుసును బహుకరించారు.

ఆ తర్వాత వధూవరులు ఆ రెండు గొలుసులను పరస్పరం మార్చుకున్నారు. కుటుంబ సభ్యులు, సన్నిహిత మిత్రుల ఆశీర్వాదాలతో వేడుక ముగిసింది.

ఈ వివాహ విధానం తమిళనాడులో పెరియార్ ఈవీ రామస్వామి ప్రారంభించిన స్వాభిమాన ఉద్యమం నుంచి వచ్చింది. కుల వివక్షను ఎదుర్కోవడానికి, మతపరమైన ఆచారాల పేరుతో జరిగే అనవసర ఖర్చులను తగ్గించడానికి ఈ పద్ధతి రూపుదిద్దుకుంది. మత పెద్దల ఆధిపత్యాన్ని ఎదిరించే ఉద్దేశం కూడా ఇందులో ఉంది.

ఈ పద్ధతిలో ఖరీదైన పూజలు, పెద్ద ఎత్తున జరిగే మతపరమైన క్రతువులు ఉండవు. వధూవరులు పరస్పర సమ్మతితో దండలు లేదా గొలుసులు మార్చుకోవడం ద్వారా వివాహ బంధంలోకి అడుగుపెట్టవచ్చు. 1967లో తమిళనాడు ప్రభుత్వం ఈ స్వాభిమాన వివాహాలకు చట్టబద్ధత కల్పించింది.