కేరళలో 10 రోజుల ఓనం ఉత్సవాలు; పూకళం, సాధ్య, పడవ పందాలు ప్రత్యేకం

కేరళలో ఓనం పండుగ ఉత్సవాలు ప్రారంభమయ్యాయి. మహాబలి చక్రవర్తి తిరిగి వస్తాడనే నమ్మకంతో ఈ పండుగ జరుపుకుంటారు. మలయాళ క్యాలెండర్‌లో చింగం మాసంలో 10 రోజుల పాటు వేడుకలు జరుగుతాయి. ప్రధాన రోజు తిరువోనం.

కేరళవాసులు సాంప్రదాయ దుస్తులు ధరించి బంధువులతో కలిసి వేడుకలు జరుపుకుంటారు. వివిధ కులాలు, మతాలకు చెందినవారు కలిసి ఈ పండుగను జరుపుకుంటారు. దేశ విదేశాల్లో ఉన్నవారు సొంత ఊళ్లకు వస్తారు.

ఇళ్ల ముందు పువ్వులు, ఆకులు, బియ్యం పిండితో పూకళం అనే రంగవల్లులు తీర్చిదిద్దుతారు. ఓనం చివరి రోజు అరటాకులో దాదాపు 26 రకాల వంటకాలతో సాధ్య పేరుతో విందు ఏర్పాటు చేస్తారు. అందులో అవియల్, పుట్టు, అరటి చిప్స్, సాంబార్, అన్నం, కొబ్బరి పాయసం, పెరుగు ఉంటాయి.

తుల్లల్, కథాకళి, పులికలి, తిరువాతిర వంటి సాంప్రదాయ నృత్య కార్యక్రమాలు జరుగుతాయి. కేరళ బ్యాక్‌వాటర్స్‌లో వల్లంకలి పేరుతో సాంప్రదాయ పడవ పందాలు నిర్వహిస్తారు. వందలాది మంది పడవదారులు చుండన్ వళ్ళాలను నడుపుతారు.

పున్నమడ సరస్సు నుంచి పంబా నది వరకు ఈ పడవ పందాలు ప్రసిద్ధం. ఈ ఉత్సవాలను చూసేందుకు దేశ విదేశాల నుంచి పర్యాటకులు కేరళకు వస్తున్నారు.