ITR ఫైల్ చేయడానికి ముందు Form 16 మరియు Form 16A లో తనిఖీ చేయవలసిన వివరాలు

చాలా కంపెనీలు తమ ఉద్యోగులకు Form 16 ఇవ్వడం మొదలు పెట్టాయి. Form 16 వచ్చింది కదా అని వెంటనే IT రిటర్న్లు ఫైల్ చేయొద్దని ఆర్థిక నిపుణులు చెబుతున్నారు. దానికంటే ముందు ఆ ఫారంలోని అన్ని వివరాలు సరిగ్గా ఉన్నాయా లేదా అని తెలుసుకోవాలని సూచిస్తున్నారు.

Form 16 లో Part A మరియు Part B అనే రెండు భాగాలు ఉంటాయి. Part A లో ఉద్యోగి మరియు యాజమాన్యం వివరాలు, కట్ చేసిన పన్ను, ప్రభుత్వానికి జమ చేసిన పన్ను ఎంత అనే సమాచారం ఉంటుంది. Part B లో ఉద్యోగి జీతం, డిడక్షన్లు, నికర పన్ను వివరాలు ఉంటాయి.

వీటితో పాటు Form 16A లో జీతాలపై కాకుండా వడ్డీలు, కమిషన్లు, అద్దె ఆదాయం మరియు వాటిపై విధించిన TDS వివరాలు ఉంటాయి.

Form 16 అందిన వెంటనే Part A మరియు Part B లోని జీతం మరియు TDS వివరాలను మీ శాలరీ స్లిప్‌తో పోల్చి చూసుకోవాలి. పాత పన్ను విధానాన్ని ఎంచుకున్నవారు HRA, LTA, Provident Fund, జీవిత మరియు ఆరోగ్య బీమా డిడక్షన్లను సరిగ్గా తనిఖీ చేసుకోవాలి.

ఈ వివరాలలో ఏ చిన్న తప్పు ఉన్నా మీ కంపెనీకి నివేదించి సరిచేయించుకోవాలి. లేదంటే ITR ఫైలింగ్‌లో ఇబ్బందులు రావచ్చు.

ఒకే ఆర్థిక సంవత్సరంలో ఒకటి కంటే ఎక్కువ కంపెనీల్లో పని చేసినట్లయితే అన్ని కంపెనీల నుంచి Form 16 తీసుకోవడం మర్చిపోవద్దు. వాటన్నింటినీ కలిపి రిటర్న్లు ఫైల్ చేయాల్సి ఉంటుంది.

చివరగా, Form 16 మరియు Form 16A ని ITR దాఖలు చేసిన తర్వాత కూడా కనీసం ఆరేళ్ల పాటు భద్రపరుచుకోవాలి. పన్ను వివాదాలు తలెత్తితే వీటిని ప్రామాణికంగా తీసుకుంటారు.