KGF చాప్టర్ 3 అప్‌డేట్: యష్‌కు పెద్ద షాక్? ప్రశాంత్ నీల్ డైరీలో NTR మరియు సలార్ 2

రాకింగ్ స్టార్ యష్ మరియు డైరెక్టర్ ప్రశాంత్ నీల్ కాంబినేషన్‌లో వచ్చిన KGF మరియు KGF 2 చిత్రాలు దేశవ్యాప్తంగా బాక్స్ ఆఫీస్ రికార్డులను తిరగరాశాయి. ఈ ఫ్రాంచైజీకి మూడో భాగం ఎప్పుడు వస్తుందని సినిమా ప్రేమికులు, ముఖ్యంగా యష్ అభిమానులు ఎదురుచూస్తున్నారు. అయితే తాజా సమాచారం ప్రకారం KGF 3 ఇప్పట్లో షూటింగ్ మొదలుపెట్టే అవకాశం లేదని తేలిపోయింది.

KGF 2 తర్వాత ప్రశాంత్ నీల్ ప్రభాస్‌తో సలార్ పూర్తి చేశారు. ప్రస్తుతం జూనియర్ NTR తో డ్రాగన్ చిత్రం షూటింగ్ జరుగుతోంది. డ్రాగన్ పూర్తయిన వెంటనే KGF 3 మొదలుపెడతారని అభిమానులు ఆశలు పెట్టుకున్నారు. కానీ ప్రభాస్ పుట్టినరోజు సందర్భంగా ప్రశాంత్ నీల్ స్వయంగా వచ్చే ఏడాది జూన్ నుంచి సలార్ 2 షూటింగ్ మొదలుపెడుతున్నట్లు ప్రకటించారు. దీంతో ఆయన షెడ్యూల్‌లో KGF 3 కి ఇప్పట్లో చోటు లేదని స్పష్టమైంది.

మరోవైపు యష్ KGF 2 తర్వాత సరైన వేగంతో సినిమాలు చేయలేదని టాక్ వినిపిస్తోంది. దాదాపు నాలుగేళ్ల గ్యాప్ తర్వాత గీతు మోహన్‌దాస్ డైరెక్షన్‌లో టాక్సిక్ చిత్రం పట్టాలెక్కించారు. ఆ ప్రాజెక్ట్ పూర్తయినా ప్రశాంత్ నీల్ లైనప్‌లో NTR చిత్రం మరియు సలార్ 2 ఫిక్స్ అయిపోవడంతో KGF 3 పూర్తిగా ఆటకెక్కినట్లే అని సినీ వర్గాల్లో చర్చ జరుగుతోంది. ఒకవేళ ఆ చిత్రం వచ్చినా మరో నాలుగైదు సంవత్సరాల తర్వాతే వచ్చే అవకాశం ఉందని తెలుస్తోంది.