పాట్నాలో ఖాన్ సర్ కోచింగ్‌పై దాడి: కాల్పులు, ఒకరికి గాయం

పాట్నా: బిహార్ రాజధాని పాట్నాలోని కేదార్ నగర్‌లో ప్రముఖ టీచర్ ఖాన్ సర్ నిర్వహిస్తున్న కోచింగ్ సెంటర్‌పై గుర్తుతెలియని దుండగులు దాడి చేశారు. శుక్రవారం సాయంత్రం జరిగిన ఈ దాడిలో నిందితులు కాల్పులు కూడా జరిపారు. కాల్పుల ఘటనలో ఒక వ్యక్తి గాయపడ్డారు. సమాచారం అందుకున్న పోలీసులు వెంటనే సంఘటనా స్థలానికి చేరుకుని సహాయక చర్యలు ప్రారంభించారు.

దాడి అనంతరం ఖాన్ సర్ మీడియాతో మాట్లాడారు. తమ కోచింగ్ సెంటర్‌లో చాలా తక్కువ ఫీజుతో పేద విద్యార్థులకు నాణ్యమైన శిక్షణ ఇవ్వడం వల్ల పోటీదారులు ఈ దాడికి పాల్పడ్డారని ఆయన ఆరోపించారు. 'వేల మంది విద్యార్థులు మా కోచింగ్ ద్వారా ఉన్నత ఫలితాలు సాధించడం కొంతమందిని ఇబ్బంది పెట్టింది. దీంతోనే ఇలాంటి దాడికి పాల్పడ్డారు' అని ఖాన్ సర్ తెలిపారు. పేద విద్యార్థులకు చదువుకునే హక్కు ఉందని, అందుకే ప్రభుత్వం తమకు భద్రత కల్పించాలని డిమాండ్ చేశారు.

పోలీసుల విచారణలో దాడి జరిగిన సమయంలోని సీసీటీవీ ఫుటేజ్ లభ్యమైంది. ఫుటేజ్ ఆధారంగా నిందితులను గుర్తించే ప్రయత్నం జరుగుతోంది. పక్కనే ఉన్న మరో కోచింగ్ సెంటర్‌కు చెందిన వ్యక్తులను కూడా సెక్యూరిటీ గార్డు గుర్తించినట్లు సమాచారం. ప్రస్తుతం ఈ కేసు దర్యాప్తులో ఉన్న పోలీసులు నిందితుల కోసం గాలింపు చర్యలు చేపట్టారు. భద్రత కోసం కోచింగ్ సెంటర్‌ వద్ద అదనపు పోలీసు బలగాలు మోహరించారు.