ఖరీఫ్ మొక్కజొన్న సాగు: ఆముదాలవలస KVK శాస్త్రవేత్త సూచనలు

శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త కిరణ్ కుమార్ ఖరీఫ్ మొక్కజొన్న సాగుపై రైతులకు సూచనలు చేశారు. ఉత్తర కోస్తా జిల్లాల్లో వరి తర్వాత మొక్కజొన్న విస్తీర్ణం పెరుగుతోంది. ఎక్కువ దిగుబడి కోసం సాగు ప్రారంభం నుంచే పాటించాల్సిన యాజమాన్య పద్ధతులను ఆయన వివరించారు.

మొక్కజొన్నను అన్ని రకాల నేలల్లో సాగు చేయవచ్చు. అయితే నీరు నిల్వ లేకుండా మురుగు పోయే నేలలు ఈ పంటకు అనుకూలం. మూడు నాలుగు సార్లు దుక్కి చేశాక పొలంలో పశువుల ఎరువు వేయాలి. చివరి దుక్కిలో వరుసల మధ్య 60 సెం.మీ, మొక్కల మధ్య 20 సెం.మీ దూరంలో బోదెలు కాలువలు తీసుకోవాలి.

ఎకరాకు 8 కిలోల విత్తనం సరిపోతుంది. కత్తెర పురుగు నివారణకు విత్తన శుద్ధి తప్పనిసరి. దీనికి ఫోర్టెంజా డియో అనే మందు (సయాటినిప్రోల్ + తయతాక్సజం) వాడాలి. ఒక కిలో విత్తనానికి 6 గ్రాముల మందు కలిపి విత్తుకోవాలి.

విత్తిన వెంటనే కలుపు నివారణకు అట్రాజీన్ మందును 200 లీటర్ల నీటిలో కలిపి పిచికారి చేయాలి. 15-18 రోజుల తర్వాత లాడిస్ (114 ml) + అట్రాజీన్ (400g) కలిపి మళ్లీ పిచికారి చేస్తే కలుపు రాదు. తుంగ నివారణకు హాలో సల్ఫ్యూరాన్ మిథైల్ 36 గ్రాములు ఎకరాకు వాడాలి.

ఎరువులు: ఎకరాకు 154 కిలోల యూరియా, 54 కిలోల డీఏపీ, 33 కిలోల పొటాష్ అవసరం. యూరియాను మూడు భాగాలు చేసి, మొదటి భాగం విత్తేటప్పుడు, మిగిలినవి 30వ రోజు, 60వ రోజు వేయాలి.

కాండం తొలిచే పురుగు నివారణకు పొలంలో కలుపు లేకుండా చూసుకోవాలి. ట్రైకోగ్రామా గుడ్డు బదనికలను 20,000 చొప్పున రిలీజ్ చేయడం, కార్బోఫ్యూరాన్ 3G గుళికలు మొవ్వులో వేయడం వంటి చర్యలు చేపట్టాలి. కత్తెర పురుగు ఉధృతి ఎక్కువైతే క్లోరాంట్రినీలిప్రోల్ 60 ml పిచికారి చేయాలి.

తెగుళ్లు: టర్సిగం ఆకు మచ్చ, పొడి తెగులు ఎక్కువగా వస్తాయి. టర్సిగం నివారణకు హెక్సాకోనజోల్ 2 ml లీటరు నీటిలో కలిపి పిచికారి చేయాలి. పొడి తెగులుకు కూడా ఇదే మందు సమర్థవంతంగా పనిచేస్తుంది.