వానాకాలం ఉల్లి సాగు శాస్త్రీయ యాజమాన్య పద్ధతులు

ఆంధ్రప్రదేశ్‌లో వానాకాలం (ఖరీఫ్) ఉల్లి సాగుకు అనువైన సమయం ప్రారంభమైంది. కర్నూలు జిల్లాలో 75 వేల ఎకరాల్లో ఉల్లి సాగు జరుగుతోందని అంచనా. గుంటూరు, శ్రీకాకుళం, విజయనగరం, విశాఖపట్నం జిల్లాల్లోనూ కొంతమేర సాగు ఉంది.

నాణ్యమైన అధిక దిగుబడి సాధించడానికి రైతులు శాస్త్రీయ యాజమాన్య పద్ధతులు పాటించాలని వ్యవసాయ నిపుణులు సూచిస్తున్నారు. ఖరీఫ్ సీజన్‌కు అగ్రీఫౌండ్ డార్క్ రెడ్, అర్కా నికేతన్, అర్కా కళ్యాణ్, అర్కా ప్రగతి, S-53 రకాలు అనువుగా ఉంటాయని వారు తెలిపారు.

నారు పెంపకం కోసం ఎత్తైన ప్రదేశాన్ని ఎంచుకోవాలి. ఎకరాకు 3-4 కిలోల విత్తనం సరిపోతుంది. 1 మీటర్ వెడల్పు, 3 మీటర్ల పొడవు, 15 సెం.మీ. ఎత్తుతో నారుమడిలు తయారు చేసుకోవాలి. 50% నీడనిచ్చే షేడ్ నెట్ ఉపయోగిస్తే మొలకల శాతం మెరుగుపడుతుంది.

విత్తనాన్ని ట్రైకోడెర్మా విరిడి (కిలోకు 8 గ్రాములు) లేదా 3 గ్రాముల థైరమ్/కాప్టాన్‌తో శుద్ధి చేయాలి. నారుమడిలో 10 రోజులకోసారి లీటర్ నీటికి 3 గ్రాముల కాపర్ ఆక్సిక్లోరైడ్ కలిపి పిచికారీ చేస్తే నారుకుళ్ళు తెగులు రాకుండా ఉంటుంది.

ప్రధాన పొలాన్ని 3-4 సార్లు లోతుగా దున్ని చదును చేసుకోవాలి. 30 సెం.మీ. ఎడంతో బోధలు ఏర్పాటు చేసి ఇరువైపులా నారు నాటాలి. నాటే ముందు ఒక శాతం బోర్డో మిశ్రమంలో నారును ముంచడం వల్ల భూమి నుంచి వచ్చే తెగుళ్లను నివారించవచ్చు.

చివరి దుక్కిలో ఎకరాకు 10 టన్నుల చివికిన పశువుల ఎరువు, 24 కిలోల భాస్వరం వేయాలి. 60-80 కిలోల నత్రజని, 24 కిలోల పొటాష్ ఎరువులను సమానంగా పంచి నాటే సమయాన, 30 రోజుల తర్వాత ఇవ్వాలి.

కలుపు సమస్య నివారణకు నాటే ముందు పెండిమిథాలిన్ లేదా ఆక్సిఫ్లోరోఫెన్ మందును పొలంలో పిచికారీ చేయాలి. నాటిన 30-45 రోజుల దశలో కలుపు తీసి మొదళ్లకు మట్టి ఎగదోస్తే గడ్డలు బలంగా తయారవుతాయి.

నీటి తడులు: మొదటి 60 రోజుల్లో 4-5 తడులు ఇవ్వాలి. తర్వాత గడ్డ ఊరే దశలో వారానికోసారి ఇచ్చి, కోతకు 15 రోజుల ముందు నీరు ఆపేయాలి.

తామర పురుగు నివారణకు లీటర్ నీటికి 2 మిల్లీలీటర్ల డైమిథోయేట్ లేదా ప్రిపోనిల్ కలిపి 10 రోజుల వ్యవధిలో రెండు సార్లు పిచికారీ చేయాలి.

50% ఆకులు రాలిపోయిన సమయంలో కోత చేపడితే నిల్వ నష్టం తగ్గి నాణ్యమైన ఉల్లి లభిస్తుంది. సరైన యాజమాన్యంతో ఎకరాకు 100-120 క్వింటాళ్ల దిగుబడి రావచ్చని నిపుణులు తెలిపారు.