నాపై దాడి, చీర లాగారు: డీఎంకేలో తనపై జరిగిన వేధింపులపై ఖుష్బూ సుందర్ సంచలన ఆరోపణలు

డీఎంకేలో ఉన్న సమయంలో తనపై పార్టీ సభ్యులే దాడి చేశారని బీజేపీ నేత, నటి ఖుష్బూ సుందర్ తీవ్ర ఆరోపణలు చేశారు. తాజా ఇంటర్వ్యూలో మాట్లాడిన ఆమె, పార్టీ నాయకత్వంపై తన అభిప్రాయం చెప్పినందుకు తన చీర లాగడం, జుట్టు పట్టుకుని ఈడ్చడం, చెప్పులు విసరడం వంటి చర్యలకు పాల్పడ్డారని వెల్లడించారు. డీఎంకేలో తదుపరి నాయకుడిని జనరల్ బాడీ నిర్ణయిస్తుందని అప్పటి పార్టీ అధినేత కలైఞర్ కరుణానిధి చెప్పిన విషయాన్నే తాను గొంతెత్తి చెప్పానని, అందుకు ప్రతిగా తనపై ఈ దాడి జరిగిందని ఖుష్బూ తెలిపారు. ఈ దాడి సమయంలో పార్టీ సీనియర్ నేతలు మౌనంగా చూస్తూ నిలబడిపోయారని, 'ఏమైనా చేసుకోండి' అన్నట్లు తల ఊపారని ఆమె ఆరోపించారు. డీఎంకే నుంచి కాంగ్రెస్‌లో చేరిన ఖుష్బూ, అనంతరం బీజేపీలో చేరిన విషయం తెలిసిందే.