కోయిల్ సాగర్ జలాశయం కొత్త పర్యాటక హబ్‌గా మార్చేందుకు రూ.9.5 కోట్లు మంజూరు

మహబూబ్‌నగర్ జిల్లాలోని కోయిల్ సాగర్ జలాశయాన్ని సరికొత్త పర్యాటక కేంద్రంగా అభివృద్ధి చేయడానికి ప్రభుత్వం రూ.9.5 కోట్లు మంజూరు చేసింది. ఎత్తైన కొండలు, పచ్చని పొలాలు, రిజర్వాయర్ గేట్ల నుండి దూకే నీటి సవ్వడి వంటి అందాలు ఉన్నా, కనీస సౌకర్యాలు లేక పర్యాటకులు ఇబ్బందులు పడుతున్నారు.

గతంలో రూ.3.5 కోట్లు కేటాయించగా అవి సరిపోకపోవడంతో, దేవరకద్ర ఎమ్మెల్యే మధుసూధన్ రెడ్డి అదనపు నిధుల కోసం కృషి చేశారు. ఫలితంగా ఇప్పుడు రూ.9.5 కోట్లు మంజూరు కాగా, త్వరలో పనులు ప్రారంభం కానున్నాయి.

జలాశయం వద్ద ఉన్న చేప పిల్లల ఉత్పత్తి కేంద్రానికి ఎడమవైపు పిల్లల పార్క్, ఫుడ్ కోర్ట్, అడ్వెంచర్ స్పోర్ట్స్ ఏరియా, విశ్రాంతి స్థలం, బోటింగ్ వంటి సౌకర్యాలు ఏర్పాటు చేస్తారు. తాగునీరు, శౌచాలయాలు, పార్కింగ్ ప్రదేశాలు కూడా నిర్మించనున్నారు.

తెలంగాణ పర్యాటక అభివృద్ధి కార్పొరేషన్ ఆధ్వర్యంలో పనులు చేపట్టనుండగా, ప్రస్తుతం టెండర్ల ప్రక్రియ సాగుతోంది. భవిష్యత్తులో వేలాడే వంతెనలు, నైట్ క్యాంపింగ్, ట్రెకింగ్ వంటి సౌకర్యాలు కూడా పర్యాటకులను ఆకర్షించే అవకాశం ఉంది.