ఉప్పల్ ఎలివేటెడ్ కారిడార్ : దసరా నాటికి పనులు పూర్తి చేయాలని మంత్రి కోమటిరెడ్డి ఆదేశం

హైదరాబాద్ లోని ఉప్పల్ ఎలివేటెడ్ కారిడార్ పనుల పురోగతిని మంత్రి కోమటిరెడ్డి వెంకట్ రెడ్డి సెక్రటేరియట్‌లో సమీక్షించారు. ప్రభుత్వం నిర్దేశించిన గడువులోగా పనులు పూర్తి చేయాలని, ఈ దసరా నాటికి పనులు ముగించాలని ఆయన అధికారులను ఆదేశించారు.

ప్రస్తుతం ఎలివేటెడ్ కారిడార్‌లో 60 శాతం పనులు పూర్తయ్యాయని, మిగతా 40 శాతం పనులు వేగంగా జరుగుతున్నాయని అధికారులు మంత్రికి నివేదించారు. సైట్‌లో సెగ్మెంట్ల తయారీకి 300 మంది కార్మికులు రెండు షిఫ్ట్‌ల్లో పనిచేస్తున్నారు. మంత్రి మాట్లాడుతూ, శ్రామికుల సంఖ్య పెంచి మూడు షిఫ్ట్‌ల్లో పని చేయాలని, రాత్రి 11 నుంచి ఉదయం 6 వరకు నిరంతరాయంగా పనులు కొనసాగించాలని సూచించారు.

కారిడార్ కింద 6 కిలోమీటర్లకు పైగా నిర్మించే BT రోడ్డు పనులు ఈ నెలాఖరుకు పూర్తి కావాలని మంత్రి తేల్చి చెప్పారు. నిర్మాణ సంస్థ నెలకు ఆరు స్లాబ్‌ల చొప్పున పూర్తి చేయడానికి అంగీకరించింది. అదే సమయంలో GHMC నిర్మిస్తున్న ఫ్లై ఓవర్ పనులను సమాంతరంగా పూర్తి చేయడానికి అధికారులు సమన్వయం చేసుకోవాలని ఆదేశించారు.

ప్రతి 10 రోజులకు తాను స్వయంగా క్షేత్రస్థాయిలో పనులను సమీక్షిస్తానని, అధికారులు రోజువారీ పురోగతిని పర్యవేక్షించాలని మంత్రి తెలిపారు. అన్ని అంశాల్లో వేగం పెంచి, 2026 సంవత్సరం నాటికి ఉప్పల్ ఎలివేటెడ్ కారిడార్ పూర్తిగా ప్రజలకు అందుబాటులోకి రావాల్సిందేనని ఆయన స్పష్టం చేశారు.