అనంతపురం జిల్లా పాఠశాలలో పైకప్పు ప్లాస్టర్ ఊడి విద్యార్థులు వరండాలో చదువులు

అనంతపురం జిల్లా సింగనమల మండల కేంద్రంలోని దర్గా సమీపంలో ఉన్న ప్రభుత్వ ప్రాథమిక పాఠశాలలో విద్యార్థులు ప్రమాదకర పరిస్థితుల్లో చదువుకుంటున్నారు.

ఈ పాఠశాలలో 1 నుంచి 5వ తరగతి వరకు 57 మంది విద్యార్థులు ఉన్నారు. తరగతి గదులు సరిపోకపోవడంతో కొందరు ఒకే గదిలో, మరికొందరు వరండాలో కూర్చొని చదువుకుంటున్నారు.

మొత్తం ఐదు తరగతి గదులు ఉన్నాయి. వాటిలో రెండు గదులు మంచి స్థితిలో ఉన్నాయి. మిగతా మూడు గదుల పైకప్పు ప్లాస్టర్ ఊడిపడుతోంది. దీంతో విద్యార్థుల భద్రత దృష్ట్యా ఉపాధ్యాయులు వరండాలో పాఠాలు బోధిస్తున్నారు.

ప్రధాన ఉపాధ్యాయుడు తన సొంత నిధులతో తరగతి గదుల మరమత్తులు చేయించేందుకు ముందుకు వచ్చారు. భవనం సుమారు 15 ఏళ్ల క్రితం నిర్మించారు. ప్రమాదకరమైన పైకప్పు ప్లాస్టర్ భాగాలను తొలగించారు. ఇప్పుడు సీలింగ్ మరమత్తు పనులు పూర్తి చేయాల్సి ఉందని ఉపాధ్యాయులు తెలిపారు. మరమత్తులు త్వరగా పూర్తి చేస్తే విద్యార్థుల చదువులకు ఆటంకం ఉండదని వారు పేర్కొన్నారు.