పార్లమెంట్ ప్రొరోగేషన్ లేకుండా 89 రోజులు: 2008 రికార్డు బద్దలు

పార్లమెంట్ వర్షాకాల సమావేశాలు ఆగస్టు 13న నిరవధికంగా వాయిదా పడ్డాయి. అప్పటి నుంచి సమావేశాల ముగింపు ప్రకటన (ప్రొరోగేషన్) ఇంతవరకు రాలేదు. దీంతో 89 రోజులుగా పార్లమెంట్ ప్రొరోగ్ కాకుండా కొనసాగుతోంది. ఇది పార్లమెంట్ చరిత్రలో కొత్త రికార్డు.

సాధారణంగా ఉభయ సభల అధ్యక్షులు సమావేశాలను నిరవధికంగా వాయిదా వేసిన రెండు, మూడు రోజుల్లోనే రాష్ట్రపతి ప్రొరోగేషన్ ప్రకటన జారీ చేస్తారు. ఈసారి ఆ ప్రకటన రాలేదు. అంటే ఆర్టికల్ 85(1) కింద వర్షాకాల సమావేశాలకు జారీ చేసిన ఉత్తర్వులు ఇప్పటికీ అమల్లో ఉన్నట్టే లెక్క. ఈ ఉత్తర్వులు అమల్లో ఉన్నప్పుడు రాష్ట్రపతి ప్రమేయం లేకుండానే సమావేశాలు ఏర్పాటు చేసుకునే అధికారం పార్లమెంటరీ వ్యవహారాల మంత్రిత్వ శాఖకు ఉంటుంది.

గతంలో 2008లో ఇలాంటి పరిస్థితే ఏర్పడింది. నాటి UPA ప్రభుత్వంపై అవిశ్వాస తీర్మానంపై చర్చించేందుకు లోక్‌సభ జూలై 21, 22 తేదీల్లో రెండు రోజులు సమావేశమైంది. ఆ తర్వాత సభ నిరవధికంగా వాయిదా పడింది. 87 రోజుల తర్వాత అక్టోబర్ 17న తిరిగి సమావేశాలు జరిగాయి. ఇప్పుడు ఆ రికార్డు బద్దలైంది.

మహిళా రిజర్వేషన్ బిల్లు ఆమోదం పొందేందుకే ఈసారి ప్రొరోగేషన్ చేయలేదని సమాచారం. డీలిమిటేషన్ బిల్లు కోసం కేంద్రం త్వరలో ప్రత్యేక సమావేశాలు నిర్వహించే అవకాశం ఉందని ప్రచారం జరుగుతోంది. ఈ బిల్లును కేంద్ర ప్రభుత్వం ఏప్రిల్ 17న లోక్‌సభలో ప్రవేశపెట్టింది. సరిపడా సంఖ్యాబలం లేక అప్పుడు ఆమోదం పొందలేదు. ఈ బిల్లు ఆమోదం పొందితే లోక్‌సభ సభ్యుల సంఖ్య 543 నుంచి 850కి పెరుగుతుంది.

ప్రొరోగేషన్ ప్రకటన రాకపోవడంపై కాంగ్రెస్ సహా విపక్ష పార్టీలు ఆందోళన వ్యక్తం చేశాయి. డీలిమిటేషన్ బిల్లుకు కావాల్సిన మెజారిటీ సమకూర్చుకునేందుకు ప్రభుత్వం జాప్యం చేస్తోందని విపక్ష నేతలు ఆరోపించారు. ఈ ఆరోపణలపై కేంద్ర ప్రభుత్వం నుంచి స్పందన లభ్యం కాలేదు.

శీతాకాల సమావేశాలను డిసెంబర్ 4 నుంచి 22 వరకు నిర్వహించే అవకాశం ఉందని సమాచారం. దీనిపై ఈ వారంలో అధికారిక ప్రకటన రావచ్చని తెలుస్తోంది.