యమునా నదిపై క్రూయిజ్ సేవలు ప్రారంభం.. టికెట్ ధర ₹500

ఢిల్లీలో యమునా నదిపై క్రూయిజ్ సేవలు ప్రారంభమయ్యాయి. పర్యటకులకు కొత్త అనుభూతిని అందించేందుకు ఈ సేవలను అందుబాటులోకి తెచ్చారు.

సోనియా విహార్ వద్ద కేంద్ర ఓడరేవులు, షిప్పింగ్ శాఖ మంత్రి సర్బానంద సోనోవాల్ ఈ సేవలను లాంఛనంగా ప్రారంభించారు. సోనియా విహార్ నుంచి జగత్‌పూర్ వరకు క్రూయిజ్ రాకపోకలు సాగుతాయి.

ఒక్కొక్కరికి టికెట్ ధర ₹500 ఉంటుంది. ఢిల్లీ టూరిజం వెబ్‌సైట్ ద్వారా ఆన్‌లైన్‌లో టికెట్లు బుక్ చేసుకోవచ్చు.

గత 12 ఏళ్లలో జలమార్గాల అభివృద్ధిలో గణనీయమైన పురోగతి సాధించినట్లు సోనోవాల్ తెలిపారు. ఒకప్పుడు రివర్ క్రూయిజ్ అంటే ఐరోపా వైపే అందరూ చూసేవారని ఆయన గుర్తు చేశారు. ఇప్పుడు భారత్ ఈ రంగంలో ప్రపంచానికే కొత్త ప్రమాణాలు నిర్దేశిస్తోందని అన్నారు.

గంగా, బ్రహ్మపుత్ర లాంటి పెద్ద నదులు ఉన్నా రివర్ క్రూయిజ్ అభివృద్ధి అసాధ్యమన్న ప్రతికూల వాతావరణాన్ని గత ప్రభుత్వాలు సృష్టించాయని సోనోవాల్ విమర్శించారు.