కోనసీమలో శిథిలావస్థలో ఉన్న పాఠశాలకు మరమ్మతులు ప్రారంభం

డాక్టర్ బీఆర్ అంబేద్కర్ కోనసీమ జిల్లాలోని ముమ్మిడివరం నగర పంచాయతీ పరిధిలో ఉన్న పెరిటి అగ్రహారం బడవ గ్రామంలో ఎంపీయూపీ పాఠశాల శిథిలావస్థలో ఉంది. విద్యార్థులకు కనీస సౌకర్యాలు లేకపోవడంతో గ్రామస్థులు అసంతృప్తి వ్యక్తం చేశారు.

ఈ సమస్యపై విద్యాశాఖ మంత్రి నారా లోకేష్ స్పందించారు. పాఠశాలను వెంటనే బాగు చేయాలని ఆయన అధికారులను ఆదేశించారు. కలెక్టర్ ఆదేశాల మేరకు సైట్ ఇంజనీర్ పాఠశాలను సందర్శించి పరిస్థితిని పరిశీలించారు.

పాఠశాల భవనం పరిస్థితి బాగా లేదని అధికారులు గుర్తించారు. పక్కనే ఉన్న అంగన్‌వాడీ సెంటర్‌లోని పిల్లలు కూడా ఇబ్బందులు ఎదుర్కొంటున్నారు. వెంటనే యాక్షన్ ప్లాన్ రూపొందించి, DPR తయారు చేసి మరమ్మతుల పనులు ప్రారంభిస్తున్నట్లు సైట్ ఇంజనీర్ తెలిపారు.

తన కుమార్తె చెప్పిన విషయానికి నారా లోకేష్ వెంటనే స్పందించారని ఓ విద్యార్థిని తల్లి తెలిపారు. పాఠశాలను త్వరగా మరమ్మతు చేస్తామని అధికారులు చెప్పారని విద్యార్థిని హేమశ్రీ తెలిపారు.