ఉజ్జయిని బోనాల మూలం వెనుక కథ ఏంటి? మంత్రి కొండా సురేఖ వెల్లడి

మంత్రి కొండా సురేఖ సికింద్రాబాద్‌లోని ఉజ్జయిని మహాకాళి ఆలయాన్ని సందర్శించారు. ఈ సందర్భంగా ఆమె ఆలయంలో జరిగే ఉజ్జయిని బోనాల ప్రారంభం వెనుక ఉన్న చారిత్రక వివరాలు పంచుకున్నారు.

1813లో అక్కడి సైనికులకు కలరా వ్యాధి వ్యాపించిందని, అప్పుడు వారు ఉజ్జయిని అమ్మవారిని ప్రార్థించారని ఆమె చెప్పారు. వ్యాధి నుంచి కోలుకుంటే అమ్మవారిని ఇక్కడ ప్రతిష్టించి బోనాల పండుగ చేస్తామని వారు మొక్కుకున్నారని, తర్వాత కోలుకుని అలాగే చేశారని వివరించారు. ఆనాటి నుంచి ఇక్కడ బోనాల ఉత్సవం ప్రతి ఏటా కొనసాగుతోంది.

భక్తులు తమ కోరికలు నెరవేర్చుకోవడానికి, రాష్ట్రం సుభిక్షంగా ఉండాలని, రైతులు బాగుండాలని, వర్షాలు పడాలని ఇక్కడ ప్రార్థిస్తారన్నారు. రాష్ట్ర ప్రభుత్వం చేపడుతున్న అభివృద్ధి కార్యక్రమాలు విజయవంతం కావాలని కూడా ఈ సందర్భంగా ఆమె ఆకాంక్షించారు.