కొండగట్టు అంజన్నకు 60 ఏళ్ల తర్వాత చందనోత్సవం; నవంబర్ 16 నుంచి 20 వరకు ప్రత్యేక పూజలు

కొండగట్టు ఆంజనేయ స్వామి ఆలయంలో 60 ఏళ్ల తర్వాత చందనోత్సవం నిర్వహించనున్నారు. ఆలయ అధికారులు ఏర్పాట్లు చేస్తున్నారు. ఈ కార్యక్రమానికి ముఖ్యమంత్రి, మంత్రులు, ఎమ్మెల్యేలు, దేవాదాయ శాఖ ఉన్నత అధికారులు, ఇతర ప్రముఖులకు ఆహ్వానాలు అందజేయాలని నిర్ణయించారు.

గతంలో అర్చకులు ప్రతి శనివారం మాత్రమే మూలవిరాట్‌ను చందనంతో అలంకరించేవారు. కొన్నేళ్ల తర్వాత విగ్రహంపై చందనం రెండు అడుగుల మందం పేరుకుపోయింది. ఎలుకలు బొరియలు చేయడంతో చందనం రాలిపోవడం మొదలైంది. ఈ చందనాన్ని తొలగించేందుకు 60 ఏళ్ల క్రితం తొలిసారిగా చందనోత్సవం నిర్వహించారు. ధర్మపురికి చెందిన బ్రాహ్మణులు, అర్చకులు ఈ ఉత్సవాన్ని చేపట్టారు.

అంతకుముందు స్వామి నిజరూపం ఎలా ఉండేదో ఎవరికీ తెలియదు. అప్పటి చిత్రకారుడు అలిసెట్టి మహారాజు ఆ ఆకారాన్ని గీశారు. దీనితో ఆ రూపం విస్తృతంగా ప్రాచుర్యంలోకి వచ్చింది.

ఇప్పుడు 60 ఏళ్ల తర్వాత మూలవిరాట్‌పై ఉన్న చందనాన్ని తొలగించాలని నిర్ణయించారు. గోపురాలపై ధ్వంసమైన సుదర్శన చక్రాల మరమ్మత్తు, ప్రధాన గోపురంపై కలసాల స్థాపన చేపట్టనున్నారు. గోపురాలపై శిథిలమైన దేవతా మూర్తుల విగ్రహాలకూ మరమ్మత్తు చేయించనున్నారు. నవంబర్ 16 నుంచి 20 వరకు ప్రత్యేక పూజా కార్యక్రమాలు, హోమాలు నిర్వహించేందుకు దేవాదాయ శాఖ అధికారులు ఏర్పాట్లు చేస్తున్నారు.

చందనం తొలగించే సమయంలో వాహన పూజలు మినహా మిగతా ఆర్జిత సేవలను రద్దు చేశారు. దైవదర్శనం కూడా నిలిపివేయనున్నట్లు అధికారులు తెలిపారు. భక్తులకు ఇబ్బంది కలగకుండా ఆలయ మండపంలో చెక్కతో తయారు చేసిన ఉత్సవ మూర్తిని ప్రతిష్ఠించి దర్శనం కల్పిస్తామని వారు చెప్పారు. ఉత్సవాల్లో నిధుల దుర్వినియోగం జరగకూడదని భక్తులు సూచిస్తున్నారు.