రాప్తాడు పాఠశాల ఘటన బాధిత విద్యార్థినిని బెంగళూరులో జగన్ పరామర్శ

రాప్తాడు జిల్లా పరిషత్ పాఠశాల ఘటనలో తీవ్రంగా గాయపడిన విద్యార్థినిని YSRCP అధ్యక్షుడు, మాజీ ముఖ్యమంత్రి వైఎస్ జగన్ మోహన్ రెడ్డి పరామర్శించారు. బెంగళూరులోని మణిపాల్ ఆసుపత్రిలో ఆమె చికిత్స పొందుతున్నారు.

విద్యార్థినికి కొద్దిసేపటి ముందే క్రిటికల్ సర్జరీ జరిగింది. ఈ నేపథ్యంలో జగన్ ఆమెను చూసి, వైద్యులతో మాట్లాడారు. ఆమె ఆరోగ్య పరిస్థితిపై వివరాలు అడిగి తెలుసుకున్నారు.

బాధిత విద్యార్థిని తల్లిదండ్రులను ఆయన పరామర్శించారు. వారికి ధైర్యం చెప్పి, అండగా ఉంటామని హామీ ఇచ్చారు. ఘటన ఎలా జరిగిందనే దానిపై కుటుంబ సభ్యులను ఆయన అడిగి తెలుసుకుంటున్నారు.

ఈ ఘటనపై జగన్ ఇప్పటికే ట్వీట్ చేసి తీవ్రంగా ఖండించారు. తరగతి గదిలో చదువుతున్న విద్యార్థులకు ఇలాంటి పరిస్థితి ఎదురైతే ఏమవుతుందని ఆయన ప్రశ్నించారు. విద్యార్థులకు సురక్షితమైన వాతావరణం కల్పించాల్సిన బాధ్యత ప్రభుత్వంపై ఉందని ఆయన అన్నారు.

ఆసుపత్రి నుంచి బయటకు వచ్చాక జగన్ మీడియాతో మాట్లాడే అవకాశం ఉంది. దానికి సంబంధించిన ఏర్పాట్లు చేసినట్లు సమాచారం. ఈ ఘటనపై రాష్ట్ర ప్రభుత్వం లేదా అధికారుల స్పందనపై ఇప్పటివరకు సమాచారం లభ్యం కాలేదు.