కొండగట్టు ఆంజనేయ స్వామి చందనోత్సవం: 60 ఏళ్లకోసారి నిజరూప దర్శనం

కొండగట్టు ఆంజనేయ స్వామి దేవస్థానంలో 60 సంవత్సరాలకు ఒకసారి నిర్వహించే చందనోత్సవానికి అధికారులు ఏర్పాట్లు చేస్తున్నారు. ఈ నెల 15 నుంచి 20 వరకు ఐదు రోజుల పాటు చందనోత్సవం, మహా సంప్రోక్షణ కార్యక్రమాలు జరగనున్నాయి.

ఈ కార్యక్రమాల్లో భాగంగా స్వామి వారి మూల విరాట్‌పై ఉన్న చందనం, సింధూరం తొలగిస్తారు. అనంతరం ప్రత్యేక పూజలు నిర్వహిస్తారు. ఈ నెల 20వ తేదీ ఉదయం 9:59 గంటలకు స్వామి వారి నిజరూప దర్శనం ప్రారంభమవుతుంది.

భక్తులు ఈ నెల 21 నుంచి డిసెంబర్ 29 వరకు నిజరూప దర్శనం చేసుకోవచ్చు. 41 రోజుల పాటు దర్శనం కల్పిస్తున్నట్లు అధికారులు తెలిపారు. రాష్ట్ర నలుమూలల నుంచి భక్తులు రానుండడంతో భారీ ఏర్పాట్లు చేస్తున్నారు.

గత 60 సంవత్సరాలుగా మంగళవారం, శనివారం రోజుల్లో స్వామి వారికి చంద్రాలంకారం చేస్తున్నారు. ఈ అలంకారం క్రమంగా పెరగడంతో మూల విరాట్ పూర్తి రూపం కనిపించడం లేదు. అందుకే 60 ఏళ్లకోసారి ఈ చందనోత్సవాన్ని విశేషంగా నిర్వహిస్తారు.

బాల్యదశలో చందనోత్సవాన్ని చూసిన వారు మళ్లీ మలిదశలో దర్శించుకునే భాగ్యం లభిస్తుందని అర్చకులు చెబుతున్నారు. భక్తులకు ఎలాంటి ఇబ్బంది కలగకుండా అన్ని సౌకర్యాలు ఏర్పాటు చేస్తున్నట్లు అధికారులు తెలిపారు.