కోటియా సరిహద్దులో ఉద్రిక్తతలు: రేషన్ బియ్యం వాహనాన్ని అడ్డుకున్న ఒడిశా పోలీసులు

ఆంధ్రప్రదేశ్-ఒడిశా సరిహద్దులోని కోటియా గిరిజన గ్రామాలకు వెళ్తున్న రేషన్ బియ్యం వాహనాన్ని ఒడిశా పోలీసులు అడ్డుకున్నారు. దీంతో కోటియా ప్రాంతంలో మళ్లీ ఉద్రిక్తతలు నెలకొన్నాయి. ఘటన నేరడి వలస ప్రాంతంలో జరిగింది.

వాహనాన్ని వదిలేయాలని ఏపీ పోలీసులు కోరారు. ఒడిశా పోలీసులు అంగీకరించలేదు. దీంతో ఇరు వర్గాల మధ్య వాగ్వాదం జరిగింది. ఇరు వర్గాలు తోసుకోవడంతో ఉద్రిక్తత మరింత పెరిగింది. ఏపీలో స్థానిక సంస్థల ఎన్నికలు జరుగుతున్న నేపథ్యంలో ఈ ఘటన చోటు చేసుకుంది.

కోటియా గ్రామాల ప్రజలు ఏపీ పోలీసులకు మద్దతుగా నిలిచారు. ఒడిశా పోలీసులు ఏర్పాటు చేసిన బ్యారికేడ్లను వారు తొలగించారు. ఇప్పటికే ఉన్న ఏడు ప్లాటూన్లతో పాటు మరో 10 ప్లాటూన్ల బలగాలను ఒడిశా పోలీసులు రంగంలోకి దించారు. తాత్కాలిక చెక్‌పోస్టులను ఎత్తివేయాలని స్థానిక గిరిజనులు డిమాండ్ చేస్తున్నారు.

1936లో ఒడిశా దేశంలో తొలి భాషా ప్రయుక్త రాష్ట్రంగా ఏర్పడినప్పటి నుంచి ఈ వివాదం కొనసాగుతోంది. పూర్వపు జైపూర్ జమీందారీ పరిధిలోని పొట్టంగి తాలూకాలో కోటియా ఉందని ఒడిశా చెప్తోంది. కోటియాపై తమకు అధికారిక ల్యాండ్ రికార్డులు ఉన్నాయని ఆంధ్రప్రదేశ్ వాదిస్తోంది.

ఇక్కడి ప్రజలకు ఏపీ రేషన్ కార్డులు, ఆధార్, ఓటర్ కార్డులు ఇస్తోంది. ఒడిశా కూడా అభివృద్ధి కార్యక్రమాలు చేపడుతోంది. ఇరు రాష్ట్రాల ఎన్నికల్లో ఇక్కడి ప్రజలు ఓటు వేస్తున్నారు. సరిహద్దు వివాదం వల్ల శాశ్వత అభివృద్ధి పనులు, పరిశ్రమలు, మౌలిక సదుపాయాల కల్పన ముందుకు సాగడం లేదు.