రేవంత్ సవాల్‌కు కేటీఆర్ దీటు: బహిరంగ చర్చకు సిద్ధమన్నారు

సీఎం రేవంత్ రెడ్డి విసిరిన సవాల్‌ను బీఆర్‌ఎస్ వర్కింగ్ ప్రెసిడెంట్ కేటీఆర్ స్వీకరించారు. ప్రభుత్వ వైఫల్యాలపై బహిరంగ చర్చకు తాను సిద్ధమని ప్రకటించారు.

చర్చ విషయం, స్థలం, తేదీని రేవంత్ రెడ్డి నిర్ణయించుకోవచ్చని ఆయన తెలిపారు. వరంగల్ చౌరస్తా లేదా అశోక్ నగర్ చౌరస్తాలో చర్చ పెట్టుకోవచ్చని సూచించారు.

‘మీరు రైతు డిక్లరేషన్, రెండు లక్షల ఉద్యోగాల హామీలతో సభలు పెట్టిన చోటే చర్చకు రండి’ అని కేటీఆర్ సవాల్ చేశారు. సరైన గణాంకాలతో మీ వైఫల్యాలు నిరూపించకపోతే రాజకీయాల నుంచి శాశ్వతంగా తప్పుకుంటానని హామీ ఇచ్చారు.

ఇటీవల రేవంత్ రెడ్డి మాట్లాడుతూ, బీఆర్‌ఎస్ పాలనపై చర్చకు రావాలని కేటీఆర్‌కు సవాల్ విసిరిన సంగతి తెలిసిందే. ఈ నేపథ్యంలో తాజా సవాల్‌పై సీఎం రేవంత్ రెడ్డి స్పందన ఇంకా రాలేదు.