కుంట్లూరులో మట్టి రోడ్లు, తాగునీటి ఇబ్బందులు; ఎమ్మెల్యే స్పందన

హైదరాబాద్ శివారులోని కుంట్లూరు పరిసర కాలనీల్లో నివసించే ప్రజలు మౌలిక సదుపాయాల సమస్యలతో ఇబ్బంది పడుతున్నారు. హయత్ నగర్ సమీపంలోని కుంట్లూరు ఇటీవల మల్కాజ్‌గిరి మున్సిపల్ కార్పొరేషన్‌లో విలీనమైంది.

కానీ అక్కడ ఇప్పటికీ మట్టి రోడ్లే ఉన్నాయి. వర్షం పడినప్పుడు రోడ్లు బురదగా మారుతున్నాయి. స్కూల్ పిల్లలు, వాహనాల రాకపోకలకు తీవ్ర ఇబ్బంది ఉంటోంది. రాత్రివేళ వీధి దీపాలు సరిగా వెలగడం లేదు.

తాగునీరు 15 నుంచి 20 రోజులకు ఒకసారి మాత్రమే వస్తోందని కాలనీ వాసులు చెప్పారు. డ్రైనేజీ లీకేజీలు ఉన్నాయి. సెప్టిక్ ట్యాంకులు పొంగిపోతున్నాయి. వీటిని శుభ్రం చేయించుకోవడానికి ప్రతి నెలా ₹2,000 నుంచి ₹6,000 వరకు ఖర్చు అవుతోందని వారు తెలిపారు. మరికొందరు మూడు నుంచి నాలుగు నెలలకు ఒకసారి ₹3,000 నుంచి ₹4,000 వరకు ఖర్చు అవుతోందన్నారు.

కాలనీ వాసులు పలుసార్లు మున్సిపల్ కార్యాలయానికి వెళ్లి ఫిర్యాదులు ఇచ్చారని చెప్పారు. అయినా పరిష్కారం కాలేదని వారు అంటున్నారు.

ఇబ్రహీంపట్నం ఎమ్మెల్యే మల్రెడ్డి రంగారెడ్డి స్పందిస్తూ, శివారు ప్రాంతాల్లో అభివృద్ధి పనులు ఆలస్యం అవుతున్నది వాస్తవమేనని అన్నారు. రత్న కాలనీ, కుంట్లూరు పరిసర ప్రాంతాల సమస్యలను త్వరగా పరిష్కరిస్తామని చెప్పారు. నియోజకవర్గంలో ఎక్కడా మట్టి రోడ్లు, డ్రైనేజీ సమస్యలు లేకుండా చేయడమే లక్ష్యమని ఆయన తెలిపారు.