కన్నెపల్లి పంపుల నుంచి నీళ్లు విడుదల చేయాలని కేటీఆర్ హెచ్చరిక

కాళేశ్వరం ఎత్తిపోతల పథకం పరిధిలోని కన్నెపల్లి పంప్ హౌస్ నుంచి సాగునీటి కోసం నీటిని విడుదల చేయాలని BRS వర్కింగ్ ప్రెసిడెంట్ కేటీఆర్ ప్రభుత్వాన్ని డిమాండ్ చేశారు.

భూపాలపల్లి జిల్లాలోని కన్నెపల్లి పంప్ హౌస్‌ను కేటీఆర్ ఇవాళ సందర్శించారు. ఈ సందర్భంగా ఆయన మాట్లాడుతూ, ప్రభుత్వ నిర్లక్ష్యం వల్ల రైతుల నాట్లు ఎండిపోతున్నాయని ఆరోపించారు. కన్నెపల్లి వద్ద పంప్ ఆన్ చేస్తే నీటిని పైకి ఎత్తిపోయవచ్చని, దీని వల్ల దాదాపు లక్ష ఎకరాలకు సాగునీరు అందుతుందని ఆయన పేర్కొన్నారు.

ప్రభుత్వం తనను నీటి పంప్‌హౌస్ వైపు వెళ్లకుండా అడ్డుకునే ప్రయత్నం చేస్తోందని కేటీఆర్ ఆరోపించారు. మేడిగడ్డ బ్యారేజీ రిపేర్ల విషయంలో L&T సంస్థ సిద్ధంగా ఉన్నా ప్రభుత్వం ముందుకు రావడం లేదని చెప్పారు. నీటిని విడుదల చేయాలన్న డిమాండ్‌పై ప్రభుత్వం స్పందించకపోతే దాదాపు 50 నుంచి 60 వేల మందితో కన్నెపల్లి పంప్‌హౌస్ ముట్టడిస్తామని హెచ్చరించారు.

ఈ విషయంపై తెలంగాణ ప్రభుత్వ స్పందన తెలియాల్సి ఉంది.