వచ్చే ఏడాది నుంచి తెలంగాణలో పాదయాత్ర చేపట్టే యోచనలో కేటీఆర్: పార్టీ వర్గాలు

BRS వర్కింగ్ ప్రెసిడెంట్ కేటీఆర్ వచ్చే ఏడాది నుంచి రాష్ట్రవ్యాప్తంగా పాదయాత్ర చేపట్టాలని యోచిస్తున్నారని పార్టీ వర్గాలు తెలిపాయి.

కాంగ్రెస్ ప్రభుత్వం ప్రకటించిన ఆరు గ్యారంటీల అమలులో వైఫల్యాలు, రైతు రుణమాఫీ ఆలస్యం, ఉద్యోగాల క్యాలెండర్ అమలు, ప్రాజెక్టుల నిర్వహణ వంటి అంశాలను ప్రజల్లోకి తీసుకెళ్లడమే ఈ పాదయాత్ర లక్ష్యమని వారు చెబుతున్నారు. గ్రామీణ ప్రాంతాల్లో ప్రజలతో ప్రత్యక్షంగా కనెక్ట్ కావడం ద్వారా పార్టీ క్యాడర్‌కు ఉత్సాహం తీసుకురావడంతోపాటు, ప్రతిపక్షంగా బలాన్ని పెంచుకోవాలని కేటీఆర్ భావిస్తున్నట్లు సమాచారం.

ఇప్పటికే జిల్లాల టూర్ పూర్తి చేసి, కార్యకర్తల్ని యాక్టివ్ చేసిన కేటీఆర్, త్వరలోనే పాదయాత్ర మార్గం, ప్రారంభ జిల్లా తదితర వివరాలను ప్రకటించే అవకాశం ఉందని పార్టీ వర్గాలు తెలిపాయి. మరోవైపు మాజీ మంత్రి హరీశ్ రావు మెదక్ జిల్లా నుంచి బస్సు యాత్రలు చేపట్టనున్నారు.

తెలుగు రాష్ట్రాల్లో గతంలో పలువురు నేతలు పాదయాత్రలు చేపట్టి, తర్వాత ఎన్నికల్లో విజయం సాధించిన సంఘటనలు ఉన్నాయి. వైఎస్ రాజశేఖర్ రెడ్డి, చంద్రబాబు నాయుడు, జగన్, నారా లోకేశ్, రేవంత్ రెడ్డి వంటి నేతలు ఇలాంటి యాత్రలతో ప్రజలకు చేరువయ్యారు. ఈ నేపథ్యంలో కేటీఆర్ కూడా అదే వ్యూహం అనుసరిస్తున్నారని విశ్లేషకులు పేర్కొంటున్నారు.