లాల్ దర్వాజా మహంకాళి బోనాలు: వేలాది మంది భక్తులతో కోలాహలం

లాల్ దర్వాజా సింహవాహిని మహంకాళి అమ్మవారి బోనాల ఉత్సవాలు భక్తిశ్రద్ధలతో కొనసాగుతున్నాయి. ఉదయం 4:30 గంటలకు మొదలైన పూజా కార్యక్రమాలతో వేలాది మంది భక్తులు బోనం సమర్పించేందుకు హైదరాబాద్‌లోని పాతబస్తీకి తరలివచ్చారు.

ఈ సంవత్సరం బోనాల సందడిలో రాజకీయ, సినీ ప్రముఖులు కూడా పాల్గొన్నారు. BRS వర్కింగ్ ప్రెసిడెంట్ కేటీఆర్, కాంగ్రెస్ నాయకుడు జగ్గారెడ్డి, నటుడు విజయ్ దేవరకొండ, గాయని మంగ్లి తదితరులు అమ్మవారిని దర్శించుకున్నారు. విజయ్ దేవరకొండ తన తమ్ముడితో కలిసి వచ్చారు. మంగ్లి తన చెల్లితో బోనం ఎత్తుకున్నారు.

భక్తుల రద్దీ దృష్ట్యా పోలీసులు భారీ భద్రతా ఏర్పాట్లు చేశారు. 200 మంది సిబ్బందితో బందోబస్తు ఏర్పాటు చేశారు. 100 సీసీ కెమెరాల నిఘా ఏర్పాటు చేశారు. బోనం సమర్పించే వారికి ప్రత్యేక క్యూ లైన్ ఏర్పాటు చేశారు. అయితే, ఈ ప్రత్యేక లైన్ కూడా నెమ్మదిగా కదలడంతో భక్తులు గంటన్నర నుంచి రెండు గంటల వరకు వేచి ఉండాల్సి వచ్చింది. కొందరు భక్తులు ఈ విషయంపై అసౌకర్యం వ్యక్తం చేశారు.

పోలీసులు భక్తులను చెకింగ్ చేసిన తర్వాతే ఆలయంలోకి అనుమతిస్తున్నారు. ఎక్కడికక్కడ మెడికల్ క్యాంప్‌లు, అంబులెన్సులు అందుబాటులో ఉంచారు. GHMC అధికారులు, వైద్య సిబ్బంది సమన్వయంతో ఏర్పాట్లు చేశారు. త్రాగునీరు కూడా అందుబాటులో ఉంచారు.

ఇవాళ సాయంత్రం అమ్మవారికి శాంతి కళ్యాణం నిర్వహిస్తారు. రేపు సోమవారం రంగం, భవిష్యవాణి, పోతురాజుల విన్యాసాలు, భవాని రథయాత్రతో ఈ బోనాల ఉత్సవాలు ముగుస్తాయని ఆలయ ప్రధాన అర్చకులు తెలిపారు.