సికింద్రాబాద్‌లో లష్కర్ బోనాలు ప్రారంభం; మంత్రి పొన్నం ప్రభాకర్ తొలి బోనం సమర్పణ

సికింద్రాబాద్‌లోని ఉజ్జైని మహంకాళి అమ్మవారి ఆలయంలో లష్కర్ బోనాలు ప్రారంభమయ్యాయి. రాష్ట్ర మంత్రి పొన్నం ప్రభాకర్ తెల్లవారుజామున అమ్మవారికి తొలి బోనం సమర్పించారు. భక్తుల కోసం ఆలయం వద్ద విస్తృత ఏర్పాట్లు చేశారు.

మహిళా భక్తులు బోనాలతో రావడానికి ప్రత్యేక క్యూ లైన్లు, సాధారణ భక్తులకు రెండు జనరల్ లైన్లు, వీఐపీల కోసం మరో రెండు లైన్లు ఏర్పాటు చేశారు. ఆలయానికి 500 మీటర్ల దూరంలో ప్రత్యేక పార్కింగ్ ఏర్పాటు చేయగా, వాహనదారులు అక్కడే వాహనాలు నిలిపి కాలినడకన రావాలని అధికారులు సూచించారు.

పోలీసులు భారీ బందోబస్తుతో పాటు సీసీ కెమెరాల ద్వారా నిఘా ఏర్పాటు చేశారు. ఆలయ పరిసర ప్రాంతాల్లో ట్రాఫిక్ ఆంక్షలు విధించారు. హైదరాబాద్ జలమండలి ఆధ్వర్యంలో ఐదు వాటర్ క్యాంపులు, అత్యవసర వైద్యసేవల కోసం మూడు మెడికల్ క్యాంపులను ఏర్పాటు చేశారు.

ఉజ్జైని మహంకాళి ఆలయానికి 200 సంవత్సరాల చరిత్ర ఉంది. ప్రతి సంవత్సరం ఆషాడ మాసంలో జరిగే ఈ బోనాల జాతరకు తెలంగాణతో పాటు పొరుగు రాష్ట్రాల నుండి కూడా వేలాది మంది భక్తులు వస్తారు.

మంత్రి పొన్నం ప్రభాకర్ ప్రభుత్వం తరపున బంగారు బోనం, పట్టు వస్త్రాలు సమర్పించారు. రాష్ట్ర ప్రజల శ్రేయస్సు, సమృద్ధి వర్షాలు, పాడిపంటల కోసం ప్రార్థనలు చేశారు. సీఎం రేవంత్ రెడ్డి, ఇతర మంత్రులు కూడా బోనాల ఉత్సవాలకు హాజరు కానున్నారు.