లష్కర్ బోనాలు ఘనంగా జరుపుకున్న భక్తులు; సీఎం రేవంత్, మంత్రుల ప్రత్యేక పూజలు

సికింద్రాబాద్‌లోని ఉజ్జైని మహంకాళీ అమ్మవారి లష్కర్ బోనాల పండుగ ఈరోజు ఘనంగా జరిగింది. ఉదయం నుంచి భారీ సంఖ్యలో భక్తులు ఆలయానికి తరలివచ్చి అమ్మవారికి బోనాలు సమర్పించారు.

జాతరలో భాగంగా తెలంగాణ రాష్ట్ర ప్రభుత్వం తరఫున బంగారు బోనం, పట్టు వస్త్రాలు సమర్పించారు. మంత్రి పొన్నం ప్రభాకర్ దంపతులు ఉదయం 4 గంటలకు తొలి బోనం సమర్పించడంతో జాతర అధికారికంగా ప్రారంభమైంది. అనంతరం సాధారణ భక్తులకు దర్శన భాగ్యం కల్పించారు.

ముఖ్యమంత్రి రేవంత్ రెడ్డి ఆలయానికి వెళ్లి అమ్మవారికి పట్టు వస్త్రాలు సమర్పించి ప్రత్యేక పూజలు చేశారు. ఆయన వెంట మంత్రులు పొన్నం ప్రభాకర్, కొండా సురేఖ, సీతక్క ఉన్నారు. అమ్మవారిని దర్శించిన తర్వాత సీఎం మాట్లాడుతూ రాష్ట్రంలో సమృద్ధిగా వర్షాలు కురిసి, పాడిపంటలు పెరగాలని, ప్రజలకు ఆరోగ్యం, విజయం చేకూరాలని ప్రార్థించినట్లు తెలిపారు.

భక్తుల రద్దీని దృష్టిలో పెట్టుకుని పోలీసులు పటిష్ట బందోబస్తు ఏర్పాటు చేశారు. ఏఐ టెక్నాలజీతో కూడిన నిఘా కెమెరాల ద్వారా 24/7 పర్యవేక్షణ చేస్తున్నారు. 200 మంది పోలీసులతో పాటు 20 క్రైమ్ టీమ్‌లను కూడా మోహరించినట్లు సీపీ సజ్జనర్ తెలిపారు. నాలుగో తేదీ సాయంత్రం వరకు ఆలయ పరిసరాల్లో ట్రాఫిక్ ఆంక్షలు అమల్లో ఉంటాయన్నారు. నిబంధనలు ఉల్లంఘిస్తే కఠిన చర్యలు తీసుకుంటామని హెచ్చరించారు.

వికలాంగులు, వృద్ధుల కోసం పర్యాటక శాఖ ఉచిత బ్యాటరీ వాహనాలు (ఎలక్ట్రిక్ వెహికల్స్) అందుబాటులో ఉంచింది. న్యూజిలాండ్ నుంచి వచ్చిన భక్తులు కూడా అమ్మవారిని దర్శించుకున్నారు. రేపు రంగం కార్యక్రమం, ఎల్లుండి ఘటాల ఊరేగింపు నిర్వహిస్తారని ఆలయ నిర్వాహకులు తెలిపారు.

250 ఏళ్ల చరిత్ర ఉన్న ఈ బోనాల జాతర సికింద్రాబాద్ లష్కర్ ప్రాంతాన్ని డీజే పాటలతో, శివసత్తుల పూనకాలతో, పోతురాజుల విన్యాసాలతో సందడిగా మార్చింది.