జోగులాంబ ఆలయం హుండీలో బయోడేటాతో ఉద్యోగార్ధి లేఖ, పాస్‌పోర్ట్ ఫొటోతో వివాహార్ధి లేఖ

గద్వాల జిల్లా అలంపూర్‌లోని శ్రీ జోగులాంబ బాల బ్రహ్మేశ్వర స్వామి ఆలయంలో హుండీ లెక్కింపు సమయంలో రెండు లేఖలు బయటపడ్డాయి. ఈ ఆలయం తెలంగాణలోని ఏకైక శక్తిపీఠం కావడం విశేషం.

ఇటిక్యాల మండలానికి చెందిన ఓ భక్తుడు ప్రభుత్వ ఉద్యోగం కోసం లేఖ రాశారు. చాలా ప్రయత్నాలు చేసినా ఉద్యోగం రాలేదని, అమ్మవారి ఆశీస్సులు కావాలని ఆయన రాసుకున్నారు. ఈ లేఖలో తన విద్యార్హతల వివరాలను బయోడేటా రూపంలో పొందుపరిచారు. 10వ తరగతిలో 70%, ఇంటర్‌లో 68%, టీటీసీలో 85%, డిగ్రీలో 84%, బీఈడీలో 86% మార్కులు సాధించినట్లు పేర్కొన్నారు. ప్రస్తుతం బీపీఈడీ చదువుతున్నారు. కుటుంబ సభ్యులందరినీ కాపాడాలని, భార్యాభర్తల మధ్య అన్యోన్యత ఉండాలని కూడా కోరారు.

మరో భక్తుడు తనకు త్వరగా వివాహం జరగాలని, మనశ్శాంతి కలగాలని లేఖ రాశారు. లేఖతో పాటు పాస్‌పోర్ట్ సైజు ఫొటో, పేరు, గోత్రం కూడా హుండీలో వేశారు.

ప్రతి ఏటా మాదిరే ఈసారి కూడా హుండీ లెక్కింపు జరగగా ఈ లేఖలు వెలుగులోకి వచ్చాయి. ఆలయ సిబ్బంది ఈ లేఖలను భద్రపరిచారు.