యాంటీ పేపర్ లీక్ సవరణ బిల్లుకు లోక్‌సభ ఆమోదం

లోక్‌సభలో పబ్లిక్ ఎగ్జామినేషన్స్ (ప్రివెన్షన్ ఆఫ్ అన్‌ఫెయిర్ మీన్స్) సవరణ బిల్లు 2026 ఆమోదం పొందింది. ఈ బిల్లు ద్వారా పరీక్షల పేపర్ లీక్, అవినీతి కేసుల్లో శిక్షలను మరింత కఠినతరం చేశారు.

బిల్లును ప్రవేశపెట్టిన మంత్రి తెలిపిన వివరాల ప్రకారం, వ్యక్తిగతంగా నేరానికి పాల్పడేవారికి 5 నుంచి 10 ఏళ్ల జైలు శిక్ష, ₹50 లక్షల వరకు జరిమానా విధించనున్నారు. పరీక్షల నిర్వహణ సంస్థలకు జరిమానా రూ.1 కోటి నుంచి రూ.5 కోట్లకు, పరీక్షల నిర్వహణపై నిషేధ కాలం 4 నుంచి 8 ఏళ్లకు పెరిగాయి. డైరెక్టర్లు, మేనేజ్‌మెంట్‌కు 5 నుంచి 10 ఏళ్ల జైలు, జరిమానా రూ.5 కోట్ల వరకు, ఆర్గనైజ్డ్ క్రైమ్ కేసుల్లో 7 నుంచి 10 ఏళ్ల జైలు, రూ.10 కోట్ల వరకు జరిమానా విధించే అవకాశం ఉంటుంది.

2024లో తెచ్చిన ఇదే చట్టం అమల్లోకి వచ్చినప్పటి నుంచి గత రెండేళ్లలో 52 FIRలు నమోదయ్యాయని మంత్రి చెప్పారు. ఇటీవల జరిగిన ఓ పేపర్ లీక్ ఘటనపై సీబీఐ సత్వర దర్యాప్తు చేసి, 13 మందిని అరెస్టు చేసి, 92 ప్రదేశాల్లో సోదాలు నిర్వహించింది. కోర్టులో చార్జ్‌షీట్ దాఖలై, విచారణ ప్రారంభమైంది.

ఈ బిల్లు రాజ్యసభ ఆమోదం పొందిన తర్వాత రాష్ట్రపతి సంతకంతో చట్టంగా మారనుంది.