తక్కువ పెట్టుబడితో పంటల చీడపీడల నివారణ: జిగురు అట్టలు, లింగాకర్షక బుట్టలు, ఎర పంటలు

పంటల్లో చీడపీడల నివారణకు రసాయన పురుగుమందులు మాత్రమే పరిష్కారం కాదు. సమగ్ర సస్యరక్షణ పద్ధతులతో తక్కువ ఖర్చుతో దీనిని అధిగమించవచ్చు.

జిగురు పూసిన పసుపు రంగు అట్టలను పంటలో ఉపయోగిస్తే రసం పీల్చే పురుగులు అతుక్కుని చనిపోతాయి. ప్రత్యేకించి కూరగాయలు, మిరప, పండ్ల తోటల్లో ఇవి ప్రభావవంతమని నిపుణులు చెబుతున్నారు. ఎకరాకు 10 నుండి 12 అట్టలు సరిపోతాయి. ఒక్కొక్క అట్ట ధర సుమారు రూ.15 ఉంటుంది. ఆముదం రాసిన స్థానికంగా లభించే అట్టలను కూడా వాడుకోవచ్చు.

నీలి రంగు జిగురు అట్టలు తామర పురుగులను ఆకర్షించడానికి ఉపయోగిస్తారు. మిరప, ఉల్లి, అపరాలు, పండ్ల తోటలలో వీటిని ఎక్కువగా ఉపయోగిస్తారు.

కొన్ని రకాల కాయ, కాండం తొలిచే పురుగులను లింగాకర్షక బుట్టల ద్వారా అదుపు చేయవచ్చు. ఎకరాకు 4 నుండి 8 బుట్టలు ఉంచితే మగ పురుగులు ఆకర్షింపబడి బుట్టలో పడిపోయి సంతానోత్పత్తి తగ్గుతుంది.

ఎర పంటలుగా పంట చుట్టూ జొన్న లేదా మొక్కజొన్న విత్తుకుంటే రసం పీల్చే పురుగులు నేరుగా పంటపై వాలకుండా అడ్డుకోవచ్చు. దీనివల్ల మిత్ర పురుగుల సంఖ్య కూడా పెరుగుతుంది.

నిపుణులు చెప్పిన ఈ విధానాలను రైతులు అవలంబించినట్లయితే రసాయనాల వాడకం తగ్గి పెట్టుబడి దక్కుతుందని చెప్పారు.