LPG e-KYC మే 16లోపు తప్పనిసరి; చేయకపోతే కనెక్షన్ రద్దు, కమర్షియల్ సిలిండర్ ధర రూ.209 తగ్గింపు

LPG వినియోగదారులు తప్పనిసరిగా e-KYC పూర్తి చేయాలని చమురు సంస్థలు ప్రకటించాయి. మే 16లోపు e-KYC చేసుకోకపోతే, మే 17 నుంచి గ్యాస్ కనెక్షన్ రద్దు చేస్తామని హెచ్చరించాయి. డూప్లికేట్, అక్రమ కనెక్షన్లను నివారించడానికి ఈ నిర్ణయం తీసుకున్నారు.

e-KYC ను గ్యాస్ ఏజెన్సీలో, గ్యాస్ డెలివరీ సిబ్బంది ద్వారా ఇంటి వద్ద, లేదా ఆన్‌లైన్ పోర్టల్ ద్వారా పూర్తి చేయవచ్చు. అయితే సర్వర్ సమస్యల వల్ల ఆన్‌లైన్ ప్రక్రియలో ఇబ్బందులు ఎదురవుతున్నాయని వినియోగదారులు చెబుతున్నారు.

మరణించిన వారి పేరిట ఉన్న కనెక్షన్లను కుటుంబ సభ్యులు వాడకూడదని, వాటిని సంబంధిత ఏజెన్సీలో సరెండర్ చేసి మరొకరి పేరుకు బదిలీ చేయించుకోవాలని సూచించారు. వృద్ధులు, అనారోగ్యంతో ఇంటికే పరిమితమైనవారు డెలివరీ సిబ్బంది ద్వారా e-KYC చేయించుకోవచ్చు. కొవిడ్ సమయంలో వేరే ప్రాంతాలకు వెళ్లి అక్కడే స్థిరపడిన వారు తమ గ్యాస్ కనెక్షన్లను ఇతరులు వాడుతుంటే, అది నేరమని హెచ్చరించారు. కనెక్షన్ తిరిగి తీసుకోవాలంటే స్వయంగా వచ్చి e-KYC పూర్తి చేయాలి లేదా రద్దు చేసుకోవాలి.

ఇదిలావుండగా, కమర్షియల్ ఎల్పీజీ సిలిండర్ ధరలో కేంద్ర ప్రభుత్వం మరో రూ.209 తగ్గింపు ప్రకటించింది. దీంతో రెండు నెలల్లో మొత్తం రూ.450 చొప్పున ధర తగ్గింది. అయితే, ఈ ధర తగ్గింపు ప్రయోజనం రెస్టారెంట్లు, టిఫిన్ సెంటర్లలో వినియోగదారులకు అందడం లేదు. కేంద్రం భవిష్యత్తులో మరింత ధర సవరణ చేపట్టే అవకాశం ఉంది.